Facebook սոցիալական ցանցի հիմնադիր Մարկ Ցուկերբերգը Apple-ի արտադրանքի գները չափազանց բարձր է համարում, իսկ Թիմ Կուկի պարզաբանումները՝ ուղղակի անհեթեթ:
Իր մտքերով Ցուկերբերը կիսվել է TIME-ին տված հարցազրույցում: Այս տարվա սեպտեմբերին Թիմ Կուկը հայտարարել էր, որ այն ընկերությանը, որը հավաքում է օգտատերերի տվյալներն ու պահպանում դրանք, պետք է զգուշությամբ վերաբերվել: Նա անվանում չի տվել, բայց շատերը եկան այն եզրակացության, որ նա ի նկատի է ունեցել Facebook-ն ու Google-ը:
Մարկ Ցուկերբերգը նման մտքերը սխալ է համարում: Նա վստահ է, որ վճարովի ծառայությունը չի կարող հասնել այն արդյունքների, որոնց հասել է Facebook-ը: Աշխարհում ամենահայտնի սոցիալական ցանցի հիմնադիրն ընդգծել է, որ իր նպատակը ողջ աշխարհի միավորումն էր:
Ակնհայտ է, որ Ցուկերբերգը սրտին մոտ է ընդունել Կուկի խոսքերը: Նա հայտարարել է, որ եթե Apple-ը ցանկանար ավելի մոտ լինել սպառողին, ապա կնվազեցներ իր արտադրանքի գները:
