Ջոդի Ֆոսթերը «Ոսկե գլոբուս» կինոմրցանակաբաշխության ժամանակ առաջին անգամ հրապարակավ հայտարարել է իր ոչ ավանդական սեռական կողմնորոշման մասին: 50-ամյա դերասանուհու անսպասելի հայտարարությունը շոկի մեջ է գցել շատ ամերիկացիների և նրա մտերիմ ընկեր Մել Գիբսոնին:
Ջոդի Ֆոսթերը բեմ է բարձրացել կինեմատոգրաֆիայում ունեցած իր ներդրման համար մրցանակ ստանալու և միանգամից հայտարարել, որ ինքը 50 տարեկան է և լեսբուհի: Նրա խոսքով` ինքն ամբողջ կյանքում թաքցրել է դա` իր անձնական կյանքն ու հարազատներին պաշտպանելու համար:
Դիմելով արարողության հյուրերին՝ Ֆոսթերը հայտարարել է, որ իր ոչ ավանդական սեռական կողմնորոշման մասին ավելի վաղ հայտնել է ընտանիքի անդամներին և մտերիմ ընկերներին: Մինչ այժմ դերասանուհին նախընտրում էր չմեկնաբանել իր անձնական կյանքը` չնայած իր կողմնորոշման մասին Հոլիվուդում վաղուց էին խոսում:
«Եթե դուք փոքր տարիքից հայտնի եք, ապա ստիպված եք պայքարել նորմալ, իրական և ազնիվ կյանքի համար: Այդ պատճառով գաղտնիությունը միշտ առաջին հորիզոնականում է եղել»,- պարզաբանել է Ջոդին:
Ջոդի Ֆոսթերը 20 տարի շարունակ հարաբերություններ է ունեցել պրոդյուսեր Սիդնի Բեռնարդի հետ: Դերասանուհին երկու որդի ունի՝ 14-ամյա Չարլզը և 11-ամյա Քրիստոֆերը:
«Իմ կյանքի մեծագույն սեր, իմ հերոս ընկերուհի, գործընկեր, իմ նախկին սիրեցյալ, իմ սրտին մոտ ընկերուհի, իմ կյանքի համախոհ, ամենավստահելի ընկեր, 20 տարվա սիրելի կին` Սիդնի Բեռնար, շնորհակալություն քեզ»,- ասել է նա:
Մինչ Էնն Հեթուեյը հիացմունքից սրբում էր արցունքները, իսկ Մել Գիբսոնը անհասկանալի շարժումներ էր անում, դերասանուհին հավելել է. «Մել՝ իմ ընկեր, դու փրկեցիր ինձ այս կյանքում»:
Շատ քննադատներ համարում են, որ Ֆոսթերի ելույթը նվիրված էր ոչ թե իր սեռական կողմնորոշմանը, այլ կինեմատոգրաֆիայից իր հեռանալու որոշմանը: Մրցանակաբաշխությունից հետո լրագրողների հարցին, թե արդյոք դերասանուհին որոշել է հեռանա՞լ կինեմատոգրաֆիայից, Ֆոսթերը բացասաբար է պատասխանել:
