ԱՄՆ պետքարտուղար Ջոն Քերին հայտարարել է, որ նրանց բազմազանությունը, ովքեր միավորվել են՝ պայքարելու ԴԱԻՇ («Իրաքի և Շամի իսլամական պետություն») ջիհադիստական խմբավորման դեմ, վկայում է միջազգային կոալիցիայի ուժի մասին: Այս մասին հայտնում է BBC-ի ռուսական ծառայությունը:
Քերին ելույթ է ունեցել Բրյուսելում ՆԱՏՕ-ի շտաբ-բնակարանում կոալիցիայի 60 անդամների բարձր մակարդակով առաջին հանդիպման ժամանակ: Նա զգուշացրել է, որ ԴԱԻՇ-ի տապալումը կարող է տարիներ տևել, բայց դրա դեմ արշավն արդեն իր պտուղներն է տալիս: ԴԱԻՇ-ը, նրա խոսքով, վտանգավոր է միջազգային կոալիցիայի յուրաքանչյուր անդամի շահերի և արժեքների համար:
Բրյուսելում հանդիպմանը մասնակցում են Իրաքի վարչապետը, եվրոպական, արաբական և այլ երկրների ԱԳՆ ղեկավարները: Նրանք մտադիր են քննարկել արմատական խմբավորման դեմ պայքարի ռազմական ռազմավարությունը, ինչպես նաև այն հարցը, թե ինչպես կարելի է վերջ դնել Իրաք և Սիրիա ժամանող կամավոր գրոհայինների հոսքին:
