Եգիպտոսի Գերագույն դատարանը ոստիկաններին թույլատրել է մորուք թողնել: Ավելի վաղ երկրի վարչական դատարանը չեղյալ էր համարել ՆԳՆ որոշումը՝ մի քանի մորուքավոր ոստիկանի պահեստային դարձնել, և ստիպել էր վերականգնել նրանց նախկին պաշտոններում,- հայտնում է Rosbalt-ը:
Եգիպտոսի ներքին գործերի նախարարությունը վերջին ամիսներին տասնյակ բողոքներ է ներկայացրել տարբեր ատյանների դատարանների որոշումների դեմ, որոնցով ոստիկաններին թույլատրվել է մորուք ունենալ:
Իրենց հերթին, «ոչ կանոնադրային» արտաքին տեսքի համար ներքին գործերում ծառայությունից հեռացված հարյուրավոր մորուքավորներ ամիսներ շարունակ փորձել են հասնել իրենց իրավունքների վերականգնմանը, նույնիսկ հեռացվածների համաեգիպտական հասարակական կազմակերպություն են հիմնել:
Բարձրագույն վարչական դատարանի նիստը, որը պետք է վերջակետ դնի այս վեճին, տեղի կունենա հունվարի 16-ին:
Ոստիկանության մասին Եգիպտոսի օրենքով՝ յուրաքանչյուր ոստիկան պետք է ունենա համապատասխան կոկիկ տեսք, այդ թվում՝ պետք է կանոնավոր կերպով սափրվի: Որոշ տվյալներով՝ ոստիկանների արտաքին տեսքի հարցում պահանջների խստացումը կապված է այն բանի հետ, որ վարչությունում վախենում են սալավիների ամրապնդումից, որոնք իրենց կերպարը չեն պատկերացնում առանց մորուքի:
Երկրի նախկին նախագահ Հոսնի Մուբարաքի կառավարման ժամանակ իսլամիստներն ընդհատակում էին, բայց նրա պաշտոնանկությունից հետո նրանք քաղաքական ու հասարակական պայքարի են դուրս եկել:
