Վենեսուելայի պաշտպանության նախկին նախարար, պաշտոնաթող գեներալ Ռաուլ Բադուելը շաբաթ օրը հայտարարել է, որ ներկայումս հարավամերիկյան երկրում տեղի ունեցող իրադարձությունները փաստացի կարելի է գնահատել որպես պետական հեղաշրջում: Այս մասին հայտարարում է RIA Novosti-ն:
Ազատազրկված Բադուելը Վենեսուելայի քաղաքացիներին կոչ է արել վերականգնել սահմանադրական կարգը, որը, նրա կարծիքով, խախտվել է նախագահ Չավեսի սահմանադրական շրջանի շարունակման մասին Գերագույն դատարանի և երկրի իշխանությունների հայտարարությամբ:
Չավեսը ուռուցքային հիվանդության հետ կապված վիրահատության ենթարկվելուց հետո բուժման կուրս է անցնում Կուբայում:
Նշենք, որ հենց Բադուելն ու նրա հավատարիմ զորքերն են 2002-ին իշխանությունը վերադարձրել Չավեսին՝ պետական հեղաշրջման փորձից հետո, երբ նա ընդդիմադիր գործիչների կողմից մի քանի օրով հեռացվել էր իշխանությունից: Չավեսի կողմնակիցն այնուհետև անցել է ընդդիմության կողմն ու հանդես եկել սահմանադրական բարեփոխումների անցկացման դեմ, որոնք Չավեսին հնարավորություն են տվել վերընտրվել անսահամանափակ անգամներ: Բադուելն այդ բարեփոխումն անվանել է «պետական հեղաշրջում»: 2009-ին Բադուելը ձերբակալվել է, կոռուպցիայի մեղադրանքով դատապարտվել ազատազրկման:
