Թուրքիայի կառավարությունը մտադիր չէ Քրդստանի աշխատավորական կուսակցության (PKK) առաջնորդ Աբդուլլահ Օջալանի խափանման միջոցը փոխել տնային կալանքով: Ինչպես հաղորդում է MK Turkey-ն, այս մասին Սենեգալի մայրաքաղաք Դակարայում հայտարարել է Թուրքիայի վարչապետ Ռեջեփ Թայիփ Էրդողանը:
Վարչապետը նշել է, որ չի քննարկվում Օջալանին տնային կալանքի ենթարկելու մասին հարցը, քան որ այս հարցի հետ կապված ամեն ինչ պարզ է: Սակայն ամեն դեպքում, Էրդողանը գնացել է փոխզիջման. նա կարգադրել է ցմահ բանտարկության դատապարտված Օջալանի 12 քմ մակերես ունեցող բանտախցում հեռուստացույց տեղադրել:
Թուրքիայի վարչապետն անդրադարձել է նաև Փարիզում քուրդ երեք կանանց սպանություններին: Նա բոլոր կողմերին կոչ է արել ծայրահեղ զգույշ արտահայտվել և մինչև հետաքննության ավարտը շուտափույթ եզրահանգումներ չանել: Էրդողանը չի բացառել, որ այս սպանությունների նպատակն է PKK-ի հետ սկսված բանակցային գործընթացը սաբոտաժի ենթարկելը:
