«Որևէ առաջարկի մասին ես տեղեկություն չունեմ, նախկինում նմանատիպ առաջարկ չի եղել, որ 10-րդ կետից սկսեն: Թե դա նոր առաջարկ է՝ արդեն տեղյակ չեմ: Բայց ինքն անցյալով է խոսում: Համենայնդեպս, այս պահի դրությամբ՝ «Ժառանգությանը» որևէ առաջարկ չի եղել, որ քննարկենք: Նաև տեղեկություն չունեմ՝ եռյակը նմանատիպ առաջարկ ստացե՞լ է, թե՞ ոչ»,- «Առաջին լրատվական»-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը՝ անդրադառնալով վարչապետ Հովիկ Աբրահամյանի հայտարարությանը:
Վերջինս, հիշեցնենք, հինգշաբթի՝ Հանրապետական կուսակցության գործադիր մարմնի նիստից առաջ, լրագրողների հետ զրույցում հայտարարել էր, թե ընդունում է համամասնական ընտրակարգի անցնելու և արտահերթ խորհրդարանական ընտրություններ անցկացնելու հարցերը քննարկելու վերաբերյալ ոչիշխանական Եռյակի առաջարկը: Հիշեցնենք նաև, որ շաբաթներ առաջ Սերժ Սարգսյանը լրատվամիջոցներից մեկին տված հարցազրույցում հայտարարել էր, թե կառավարությանը հանձնարարել է մեկ անգամ ևս անդրադառնալ Եռյակի 12 պահանջներին: Այնուհետև Հ. Աբրահամյանը Եռյակին առաջարկեց երեքհոգանոց աշխատանքային խումբ կազմել և իր հետ քննարկել այդ կետերը: Փոխադարձաբար՝ Եռյակն իշխանությունների առաջ նախապայման դրեց, որ նախ կատարեն 10-րդ կետը, որպեսզի իրենք համոզվեն, որ նրանք իսկապես ցանկանում են քննարկել ու կատարել այդ պահանջները և ոչ թե դրա իմիտացիան են անում:
Իսկ այդ կետով ոչիշխանական ուժերն իշխանություններից պահանջում էին փոփոխություններ կատարել Ընտրական օրենսգրքում, որի արդյունքում պետք է անցում կատարել 100-տոկոսանոց համամասնական ընտրակարգին, և ընտրություններից հետո պետք է հրապարակել ընտրություններին մասնակցած մարդկանց ցուցակը: «Ժառանգություն» խմբակցության ղեկավար Ռուբիկ Հակոբյանն այդ կապակցությամբ հրավիրված Եռյակի նիստից հետո հայտարարեց, թե Ընտրական օրենսգրքի այս փոփոխությունների համար ֆինանսական ռեսուրս և ժամանակ չի պահանջվում: Փոխարենը իշխանությունները կապացուցեն, որ իսկապես ցանկանում են կատարել կամ քննարկել այդ կետերը: Խորհրդարան Եռյակի հետ բանակցությունների եկած՝ կառավարության աշխատակազմի ղեկավար-նախարար Դավիթ Հարությունյանն ու Ազգային ժողովի նախագահ Գալուստ Սահակյանը մերժել էին Եռյակի այս նախապայմանը: Եվ հետաքրքիր է, որ օրեր հետո Հ. Աբրահամյանը հայտարարում է, թե պատրաստ է քննարկել Ընտրական օրենսգրքում փոփոխություններ կատարելու այդ առաջարկը:
Արդյոք Հ. Աբրահամյանն իր այդ առաջարկությունը նախ ուղարկել է Եռյակից «Բարգավաճ Հայաստանի՞ն»: Չէ։ որ հիշյլա կառույցում այդ ուժն է դոմինանտը: Ա. Մարտիրոսյանը տեղյակ չէ այդ մասին, և նրա խոսքերով՝ Եռյակում դրա հետ կապված որևէ քննարկում չի եղել: Ամեն դեպքում, Հ. Աբրահամյանի այդ հայտարարությունը առաջարկության նման է հնչում: «Եռյակը պատրա՞ստ է գնալ քննարկման» հարցին Ա. Մարտիրոսյանը պատասխանեց. «Չեմ կարող ասել, որովհետև եթե խոսքը քննարկման մասին է, ապա այս դեպքում այն մի ուժով չի լինում: Երբ առաջարկը կլինի, այդ ժամանակ կքննարկենք այդ հարցը»:
ԲՀԿ ներկայացուցիչ Միքայել Մելքումյանը նույնպես հայտարարել է, որ իրենք դեռ պաշտոնական առաջարկ չեն ստացել: Ստանալու դեպքում էլ չի բացառել, որ Եռյակն իշխանությունների հետ շփումներ կսկսի:
Իսկ ինչո՞ւ իշխանություններն այս հարցում մի փոքր նահանջեցին ու ընդունեցին ոչիշխանական ուժերի նախապայմանը: «Չգիտեմ, բայց ես կարծում եմ, որ մենք, հասարակությունը, քաղաքական ուժերը պետք է ճնշումը մեծացնենք, որ գնանք արտահերթ ընտրությունների: Հակառակ պարագայում իշխանությունները ժամանակ կշահեն, կվերադիրքավորվեն և կանեն այն, ինչ մինչև այժմ արել են»,- պատասխանեց Ա. Մարտիրոսյանը:
