Վենեսուելայի փոխնախագահ Նիկոլաս Մադուրոն մտադիր է մոտակա ժամերին մեկնել Կուբայի մայրաքաղաք՝ Ուգո Չավեսին այցելելու նպատակով։ Վենեսուելայի նախագահն այնտեղ բուժման կուրս է անցնում: Այս մասին նա հայտարարել է պետական հեռուստաալիքի ուղիղ եթերում:
Մադուրոյի խոսքերով՝ իրեն կուղեկցեն Բարինասի նահանգապետ Ադան Չավեսն ու գիտության և տեխնոլոգիաների նախարար Խորխե Արրեասը։ Փոխնախագահը հիշեցրել է, որ Կուբայի մայրաքաղաքում է արդեն գտնվում Արգենտինայի նախագահ Քրիստինա Ֆերնանդես դե Քրիշները: Մադուրոն ծրագրում է նաև հանդիպել Պերուի ղեկավար Օլյանտա Ումալայի հետ:
Հինգշաբթի օրը Հավանայում Չավեսին աջակցելու համար զանգվածային միտինգ է տեղի ունեցել: Միտինգին մասնակցել են ավելի քան 20 երկրների պատվիրակություններ: Ուգո Չավեսը բուժվում է Կուբայում, որտեղ նրան, քաղցկեղի հետ կապված, վիրահատել են:
