2012թ. նոյեմբերի 30-ի դրությամբ ԱՊՊԱ պայմանագիր ունեցող ավտոտրանսպորտային միջոցների քանակն աճել է` կազմելով 379.473: Նախորդ ամսվա վերջին օրվա համեմատ այս ցուցանիշն աճել է 7.463-ով: Վարորդները ընդհանուր առմամբ ավտոապահովագրող կազմակերպությունների բյուջե են վճարել 13 մլրդ 613 մլն 349 հազար դրամ: Հետաքրքրական է, որ այդ թիվը նախորդ տարվա նույն ժամանակաշրջանի համեմատ պակաս է գրեթե 616 մլն դրամով, համապատասխանաբար պակասել են նաև ապահովագրվող ավտոմեքենաները՝ 2.886-ով: Այսինքն` սա կարող է լինել կամ արտագաղթի, կամ բնակչության կենսամակարդակի անկման հետևանք, կամ էլ այդ երկուսը միասին:
Ավտոապահովագրողների բյուրոյի հրապարակած հաշվետվության համաձայն՝ աճում են նաև հատուցումների ցուցանիշները: Այսպես. նոյեմբեր ամսվա ընթացքում բավարարված դիմումների գծով վճարված (վճարվելիք) հատուցումների ընդհանուր գումարը նախորդ ամսվա համեմատ աճել է մոտ 103.1 մլն դրամով և կազմում է մոտ 978.5 մլն դրամ: Որոշակի չափով աճել է նաև հատուցման համար ներկայացված դիմումների միջին ամսական քանակը (հունվար-հոկտեմբեր ամիսների ընթացքում` միջինը ամսական 3.631 դիմում, իսկ հունվար-նոյեմբեր ամիսների ընթացքում` 3.679): Հատուցման միջին չափը աճել է մոտ 36.740 դրամով (2012թ. հունվար-նոյեմբեր ամիսների համար` 235.102 դրամ):
Նոյեմբեր ամսվա դրությամբ վնասաբերության ցուցանիշը փոքր-ինչ աճել է` կազմելով 74 %:
