Գերմանացի հանգուցյալ դերասան Կլաուս Կինսկիի դուստրը՝ Պոլան, հորը մեղադրել է իրեն 5 տարեկանից պղծելու մեջ: Այս մասին հայտնում է BBC-ի ռուսական ծառայությունը:
Stern ամսագրին տված հարցազրույցում Պոլա Կինսկին ասել է, որ որոշել է լռությունը խախտել հոր մահից ավելի քան 20 տարի անց, քանի որ այլևս չի կարողանում հաշտվել մեծագույն դերասանի վարքի հետ:
Կինսկին մահացել է 1991թ.-ին` Կալիֆոռնիայում, 65 տարեկանում: Նա 1970-1980-ականներին խաղացել է Վերներ Հերցոգի նկարահանած մի շարք հայտնի արևմտագերմանական ֆիլմերում:
Դերասանի անձնական բուռն կյանքը վաղուց գաղտնիք չէր, բայց որ նրա սեքսուալ «ախորժակը» տարածվել է երեխաների վրա` հայտնի չէր:
Դերասանի կենսագիր Քրիստիան Դևիդը BBC-ի հետ զրույցում նշել է, որ նախկինում լսել էր Կինսկիի ու նրա դստեր հարաբերությունների մասին:
Պոլա Կինսկիի հարցազրույցը, ով ներկայում 60 տարեկան է, լույս է տեսել նրա «Մանկան շուրթերով» ինքնակենսագրական գրքի լույսընծայման նախօրեին:
«Նա վճարում էր ինձ այն բանի համար, որ ես լինեի նրա փոքրիկ սեքսուալ օբյեկտը: Ինձ պառկեցնում էր մետաքսե բարձերի վրա: Իսկ ամենասարսափելին այն էր, որ նա մի անգամ ինձ ասաց, որ դա միանգամայն բնական է, և որ հայրերը ամբողջ աշխարհում դա անում են իրենց աղջիկների հետ»,- պատմել է Պոլան:
Նրա խոսքով՝ ինքն այդքան ժամանակ լռել է, քանի որ հայրը արգելել է իրեն պատմել այդ մասին:
Պոլա Կինսկիի խոսքով` իր գրքով ինքը ցանկանում է օգնել «այլ մարդկանց, որոնք նման բան են ապրել»:
Պոլա Կինսկիի խորթ քույրն ու եղբայրը՝ Նաստասյա և Նիլոլայա Կինսկիները, չեն կարողացել տեղի ունեցածը մեկնաբանել Reuters-ին:
