Ազգային ժողովի պետաիրավական հարցերի մշտական հանձնաժողովն այսօր դրական եզրակացություն տվեց Վերահսկիչ պալատի 2015 թ. ծրագիրն առաջիկա քառօրյայում ընդգրկելուն: Իսկ ՎՊ-ի հաջորդ տարվա ծրագրերում կան արդեն դիտարկված ոլորտներ, որոնք վերաբերում են հիմնականում վարկային ծրագրերին: Արդյո՞ք վարկային այդ ծրագրերը ռիսկային են՝ այդ պատճառով էլ ԲՊ-ն հարկ է համարել դրանց կրկին անդրադառնալ: «Եկեք այդպես չանվանենք, թե որն է ռիսկային, որը՝ ոչ: Ծրագիր կա, որ ունի ռիսկային բնույթ, ծրագիր կա, որ չունի»,- «Առաջին լրատվական»-ի հարցին պատասխանեց ՎՊ նախագահ Իշխան Զաքարյանը:
ՎՊ-ի 2015 թ. ծրագրում դարձյալ ընդգրկվել է դեղերի շուկայի, մասնավորապես՝ դեղերի շրջանառության արդյունավետության և օրինականության դիտարկումը: Հիշեցնենք, որ 2013 թ. իր տարեկան հաշվետվության մեջ այս ոլորտում ՎՊ-ն բավական աղմկոտ բացահայտումներ էր արել: 2012 թ. և 2013 թ. առաջին կիսամյակում առողջապահության նախարարության կողմից մրցույթով «Նատալի ֆարմ» և «ՄԼՆ ֆարմ» ընկերություններից ձեռք է բերվել ավելի քան 224 հազար սրվակ ինսուլին, որի 1 սրվակի արժեքը եղել է 4800 դրամ: Իսկ ինսուլինն այն դեղամիջոցն է, որն անհրաժեշտ է շաքարային դիաբետ ունեցող հիվանդներին, և այդ հիվանդներին տրվում է անվճար: Այսինքն` ինսուլինը պետական միջոցներով գնվում է մասնավոր ընկերություններից և բուժհիմնարկների միջոցով հատկացվում հիվանդներին: Հետագայում որոշվել է 2013-2019 թվականների համար բանակցային ընթացակարգով անհրաժեշտ ինսուլինը ձեռք բերել «Նովո Նորդիսկ Ա/Ս» ընկերությունից` 1 սրվակը 1345 դրամով: Այսինքն` երեքուկես անգամ ավելի էժան գնով: Եվ այս փոփոխության արդյունքում 2014 թ. միայն ինսուլին ձեռք բերելու դեպքում պետբյուջեի խնայողությունը կկազմի 736 մլն դրամ:
Հիշեցնենք, որ «Նատալի ֆարմ» ընկերությունը, որից մինչ այդ սրվակը 4800 դրամով ինսուլին է ձեռք բերվել, պատկանում է ԱԺ գործարար-պատգամավոր Սամվել Ալեքսանյանին: Հայտնի է նաև, որ վերջինս մոտ մեկուկես տասնամյակ է, ինչ վերահսկում է դեղերի ներկրման և իրացման շուկան: Եվ պետությունն ամեն տարի ավելի քան եռակի թանկ գնով ինսուլին է գնել նրան պատկանող «Նատալի ֆարմից», այն էլ` մրցութային կարգով:
Արդյոք նման ռիսկե՞րն են պատճառը, որ ՎՊ-ն կրկին անդրադառնում է դեղերի շուկային: «Ոչ, այն ծավալով շատ մեծ է: Ամբողջությամբ պետք է դիտարկենք և շրջանառությունը, և գները, և արդյունավետությունը»,- կարճ պատասխանեց Ի. Զաքարյանը:
