Իրանի արտգործնախարար Ալի Աքբար Սալեհին և Արաբական պետությունների լիգայի գլխավոր քարտուղար Նաբիլ Ալ-Արաբին հանդիպել են և քննարկել տարածաշրջանային վերջին զարգացումներին առնչվող հարցեր, այդ թվում՝ պաղեստինյան հարցն ու սիրիական ճգնաժամը:
Երեկ Կահիրեում կայացած հանդիպման ժամանակ երկու պաշտոնյաներն ընդգծել են պաղեստինցի ժողովրդի օրինական իրավունքների վերականգնման և Իսրայելի ընդլայնման քաղաքականության դիմակայման համար տարածաշրջանի բոլոր երկրների ներուժը կիրառելու անհրաժեշտությունը: Այս մասին հայտնում է իրանական Press TV-ն:
Սալեհին նշել է, որ Իրանը պատրաստ է պաղեստինյան հարցի շուրջ համագործակցել ԱՊԼ-ի հետ:
Ալ-Արաբին իր հերթին պաղեստինյան հողերի օկուպացումն Իսրայելի կողմից բնութագրել է որպես Մերձավոր Արևելքի մեծագույն մարտահրավեր և կոչ արել շարունակել պաղեստինյան հարցի շուրջ Իրանի և ԱՊԼ-ի խորհրդակցությունները:
Սիրիական հարցով կողմերը տեսակետներ են փոխանակել իրադրության կարգավորման հնարավոր տարբերակների շուրջ: Սալեհին ընդգծել է Իրանի քաղաքականությունն այդ հարցում, որով կրակի դադարեցման, ազգային երկխոսության, օտարերկրյա միջամտությունից զերծ մնալու կոչ է արվում:
