Իրաքի քրդական ինքնավարությունը այս տարվա սկզբից Թուրքիայով արտահանել է 27 միլիոն բարել նավթ, որից ստացված եկամուտը կազմել է 2 միլիարդ դոլար: Այս մասին երկուշաբթի հայտարարել է Թուրքիայի էներգետիկայի և բնական պաշարների նախարար Թաներ Յըլդըզը, որի խոսքերը մեջբերում է RIA Novosti-ն:
«Այս տարվա սկզբից Հյուսիսային Իրաքից ուղարկվել է 27 միլիոն բարել նավթ, շրջանառությունը հասել է 2 միլիարդ դոլարի»,- ասել է Յըլդըզը Անկարայում էներգետիհայի 7-րդ միջազգային համագումարին: Նա ավելացրել է, որ Թուրքիայից նավթի 35 բեռնատար նավ է ուղարկվել Իրաքյան Քրդստան:
Իրաքի քրդական ինքնավարությունից նավթը Թուրքիա է հասնում խողովակաշարի միջոցով, իսկ լցանավերը բեռնվում են Միջերկրական ծովի Ջեյհան նավահանգստում:
Սադամ Հուսեյնի վարչակարգի անկումից հետո Իրաքյան Քրդստանի տարածքի նավթահորերի շահագործումը ինքնավարությունը վերցրել է իր ձեռքը: Իրաքի կենտրոնական իշխանությունները մտավախություն ունեն, որ Քրդստանը, որտեղից արտահանվում է իրաքյան նավթի 60%-ը, կարող է օգտագործել այն հետագա անջատման և անկախության հասնելու համար:
Նոյեմբերի կեսերին Բաղդադը և Էրբիլը համաձայնության հասան քրդական նավթի վաճառքի վերաբերյալ: Իրաքյան Քրդստանը կենտրոնական գանձարան կուղարկի օրական 150 հազար բարել նավթից ստացված եկամուտ, ինչը կազմում է արտադրության ընդանուր ծավալի մոտ կեսը: Սրան ի պատասխան՝ Բաղդադը կհանի արգելքը ինքնավարության հաշիվների մի մասի վրայից՝ 500 միլիոն դոլար:
