Հայաստանի Քաղաքագետների միության նախագահ Հմայակ Հովհաննիսյանի կարծիքով՝ Րաֆֆի Հովհաննիսյանն այսօր այն նույն իրավիճակում է, որում հայտնվել էր 2013 թվականի նախագահական ընտրություններից առաջ: Ըստ քաղաքագետի՝ Ր. Հովհաննիսյանն այսօր փորձում է վերագտնել իրեն՝ որպես ընդդիմոթւյան առաջնորդ. «Նա այդ դերը ստանձնել էր 2013 թվականի նախագահական ընտրությունների ժամանակ: Ոչ իշխանական ուժերը հրաժարվեցին մասնակցել նախագահական ընտրություններին, թեկնածուներ չառաջադրեցին, միաժամանակ չբոյկոտեցին ընտրությունները: Ճիշտ այնպես, ինչպես հիմա: Այն ժամանակ Րաֆֆի Հովհաննիսյանը միայնակ գնաց պայքարի ճանապարհով, թեկնածություն առաջադրեց, մասնակցեց ընտրություններին»,- «Առաջին լրատվական»- ի հետ զրույցում ասաց Հմայակ Հովհաննիսյանը:
Քաղաքագետի խոսքերով՝ հիմա էլ Րաֆֆի Հովհաննիսյանն անուղղակի կերպով հայտարարում է, որ մտադիր չէ նահանաջել Ազատության հրապարակից և ամփոփել սեփական գործունությունը գրասենյակային պայմաններում. «Մտադիր է շարունակել հրապարակային ընդդիմախոսությունը իշխանությանը և սեփական ուժերով հասնել հաղթնակի, այսինքն՝ նույն իրավիճակն է, ինչ տեղի ունեցավ 2013 թվականի նախագահական ընտրություններից առաջ: Բոլորը սպասում էին, որ Գագիկ Ծառուկյանը կառաջադրվի՝ նույնիսկ ԲՀԿ-Ն մարզերում հանդիպումներ էր ունենում կուսակիցների հետ, քննարկումներ էին գնում, հիմնական ֆավորիտներն էլ Ծառուկյանն ու Վարդան Օսկանյանն էին: Իսկ վերջին պահին՝ ինչ-ինչ պատճառներով ԲՀԿ-ն հրաժարվեց մասնակցությունից: ՀԱԿ-ն էլ, որ սպասում էր ձայնակցել այդ որոշմանը, հենց այդպես էլ վարվեց:
Նույնն էլ, ըստ էության, մեր օրերում կրկնվեց: Ասում էին, որ կլինեն հանգուցալուծումներ, հանրահավաքը չի ուշանա, սակայն վերջին պահին որոշում ընդունվեց ձեռնպահ մնալ զանգվածային միջոցառում անցկացնելուց և գործունեությունն ապահովել գրասենյակային պայմաններում»,- ընդգեց քաղաքագետը:
Նրա դիտարկմամբ՝ Րաֆֆի Հովհաննիսյանը փորձում է վերագտնել իր դերը որպես ընդդիմության առաջնորդ. «Սա միանշանակ է։ Նա այդ դերը ստանձնեց, երբ առաջադրվեց որպես ընդդիմության թեկնածու նախագահական ընտրություններին: Փաստորեն, այն իրավիճակում, երբ ոչ իշխանական ուժերը հրաժարվեցին մասնակցել նախագահական ընտրություններին, նա ստանձնեց ընդդիմության առաջնորդի դերը, ինչը հիմա փորձում էր վերագրել Ծառուկյանին»:
Մեր զրուցակցի խոսքերով՝ եթե Րաֆֆի Հովհաննիսյանին աջակցեն այն հասարակական ուժերն ու դեմքերը, որոնք կասկածանքով են վերաբերվել եռյակի գործունեությանը, ապա հնարավոր է՝ «Ժառանգության» առաջնորդը հաջողության հասնի. «Չենք կարող հերքել, որ շատերը հենց «Բարգավաճ Հայաստան»-ի առաջնային դերակատարման պատճառով է, որ կասկածանքով են վերաբերվում այդ շարժմանը: Հովիկ Աբրահամյան- Գագիկ Ծառուկյան խնամիական հարաբերություններն, անշուշտ, իրենց դրոշմը դնում են ԲՀԿ-ի գործողությունների վրա: Բողոքավոր հատվածը միշտ պաշտպանում է նրան, ով ի հեճուկս մյուսների անվճռականությանը, նահանջողական դիրքորոշումներին՝ դրոշն իր ձեռքն է վերցնում ու նետվում առաջ»:
