Մարտի 31-ին Երեւանի Գրողների տան դահլիճում տեղի ունեցավ «Սարդարապատ» շարժման նախաձեռնող խմբի կողմից կազմակերպած հավաք-քննարկումը` «Արաբական շարժումները և տարածաշրջանային զարգացումները» թեմայով:
Հիմնական բանախոսն էր տեղեկատվական տեխնոլոգիաների հայտնի մասնագետ Գարեգին Չուգասզյանը, ով քննարկման մասնակիցներին իրազեկելով «Սարդարապատ» շարժման նախաձեռնող խմբին միանալու իր որոշման մասին, հանդես եկավ Միջին Արևելքում արդի քաղաքական գործընթացների և Հայաստանում ստեղծված հեղափոխական իրավիճակի վերլուծությամբ:
Քննարկմանը ելույթներով հանդես եկան մի շարք երիտասարդ հասարակական և քաղաքական գործիչներ, ներկայացնելով նոր սերնդի գնահատականներն ու մոտեցումները ընթացիկ զարգացումների վերաբերյալ:
Մասնավորապես, Մարդու իրավունքների և ժողովրդավարության ինստիտուտի ղեկավար Արփինե Գալֆայանն անդրադարձավ քաղաքացիական հասարակության որակապես փոխվելու և կազմակերպվելու անհրաժեշտության, աշխատավոր ժողովրդի սոցիալական անպաշտպանվածության, արհմիությունների անգործության, երկրում բնապահպանական ահագնացող վտանգների և կանանց հանդեպ պահպանվող խտրականության խնդիրներին: Լրագրող Արմեն Հովհաննիսյանը ներկայացրեց Հայաստանում քաղաքացիական շարժումների ներկան ու հեռանկարները, հատկապես «Մենք ենք այս քաղաքի տերը», «Լեզվի մասին օրենքի պաշտպանության» և այլ հասարակական նախաձեռնությունների գործունեությունը: Քաղաքագետ Արթուր Ավթանդիլյանը իր ելույթում շեշտեց երիտասարդության դերը հասարակության որակական փոփոխությունների ժամանակաշրջանում, իսկ իրանագետ Արթին Առաքելյանը վերլուծեց արաբական հեղափոխական շարժումների առնչությունը Իրանի Իսլամական Հանրապետության հետ:
Հավաքի ավարտին «Սարդարապատ» շարժման նախաձեռնող խմբի անդամ Գարեգին Չուգասզյանը պատասխանեց քննարկման մասնակիցների հարցերին, իսկ հակաճգնաժամային կառավարման փորձագետ Հարություն Մեսրոբյանն ամփոփեց ելույթները, եզրահանգելով, որ երկրում ստեղծված հեղափոխական իրավիճակը հնարավորություն է տալիս թռիչքային զարգացումով հաղթահարել առկա տնտեսական, քաղաքական և գաղափարական առկա ճգնաժամերը:
Հավաքն ավարտվեց Է.Հովհաննիսյանի և Պ. Սևակի «Սարդարապատ» երգի կատարմամբ:
