ՄԱԿ-ի մարդասիրական հարցերի համակարգման գրասենյակը հրապարակել է 2012-ի Հարավային Կովկասի և Կենտրոնական Ասիայի վերաբերյալ ամփոփիչ զեկույցը: Այս մասին տեղեկանում ենք գրասենյակի կայքից:
2012 թվականը Հարավային Կովկասի և Կենտրոնական Ասիայի համար մանր և միջին աղետների տարի էր: Երկրաշարժեր տեղի ունեցան Ադրբեջանում և Տաջիկստանում, սողանքներ՝ Ղրղըզստանում, ջրհեղեղներ` Ղազախստանում, փոթորիկ` Վրաստանում: Դրանցից մեծապես տուժել են գյուղական տնտեսությունները: Նրանց հոգսերն էլ ավելի են բարդացրել գարնան վարար տեղումները, չորային ամառը, ցուրտ ձմեռը:
Աղետներից հետո կառավարությունները ջանում են տուժածներին ապահովել կացարաններով, ցուցաբերել մարդասիրական օգնություն:
Բարեբախտաբար, 2012-ին Հայաստանին տարերային աղետներ չեն պատուհասել, այնուհանդերձ` երկիրն աչքի է ընկել իր մարդասիրական ջանքերով: Այս տարի շուրջ 7000 էթնիկ հայեր Սիրիայից տեղափոխվել են Հայաստան, որից 1000-ն այնուհետև տեղափոխվել են այլ երկրներ: Մնացածը` մշտապես կամ ժամանակավորապես, տեղավորվել են իրենց պատմական հայրենիքում:
Զեկույցում նշվում է, որ Սիրիայում մոտ 100 հազար էթնիկ հայեր են բնակվում: Դեկտեմբերին Հայաստանի Միգրացիոն պետական ծառայությունը դիմել է ՄԱԿ-ին` 350 սիրիացի փախստականներին ապաստանով ապահովելու հարցում աջակցելու խնդրանքով: ՄԱԿ-ի՝ Փախստականների հարցերով վարչությունը ուղիներ է փնտրում փախստականներին ձմեռային այս սեզոնում օգնելու համար, մինչդեռ կառավարությունը աջակցում է ավելի մեծ թվով փախստականների, որպեսզի Հայաստան գան՝ զուգահեռաբար հաշվի առնելով տնտեսական ծանր պայմաններն ու գործազրկության բարձր ցուցանիշը: Շատ փախստականներ չեն ցանկանում փախստականի կարգավիճակ ստանալ: ՀՀ սփյուռքի նախարարությունը հիմնել է սիրիահայերի հարցերով համակարգման կենտրոն՝ արձագանքելու այդ մարդկանց կարիքներին:
