ՌԱՀՀԿ տնօրեն Մանվել Սարգսյանը և քաղաքագետ Լևոն Շիրինյանն այսօր լրագրողների հետ հանդիպմանը անդրադարձան առաջիկա նախագահական ընտրություններին:
Ըստ Մանվել Սարգսյանի՝ ընտրություններից առաջ ստեղծված իրավիճակը բնական է, ուժերը, որոնք դուրս մնացին ընտրական գործընթացից, հայտարարեցին՝ Հայաստանում գոյություն չունի ազատ ընտրությունների մեխանիզմ, և վիճահարույց է քաղաքական ուժերի մասնակցությունն այս ընտրություններին: Սակայն երկար տարիներ քաղաքական ուժերը` հայտարարելով, որ ընտրությունները կեղծվում են, շարունակում էին նույն գործունեությունը` կարծես թե ամեն ինչ նորմալ էր:
«Այդ գործունեությունը վերածվեց ստվերային պայմանավորվածությունների իրար հետ, գործող ռեժիմի հետ, և ոչ ոք չհասկացավ, որ այս ամենը քաղաքական համակարգը կոլապսի առաջ կկանգնեցնի և կանգնեցրեց»,- ասաց Մանվել Սարգսյանը:
Քաղաքագետ Լևոն Շիրինյանը գործընթացը երկու մասի բաժանեց՝ օբյեկտիվ ընթացք և սուբյեկտիվ գործոն: Ըստ նրա՝ ընդդիմությունը ուղղակի կրախ ապրեց: Բացի այդ, Լատինական Ամերիկայում նմանատիպ զարգացումները հանգեցրել են ավտորիտար ռեժիմների:
«Եթե տնտեսությունը օլիգարխիկ է, ըստ էության` դասակարգային հարաբերություններ չկան, ժողովուրդը լյումպենացված է, մտավորականությունը` քարշ եկող, և բնական է, որ շատ բան ակնկալել պետք չէ»,- ասաց քաղաքագետը:
Նա նշեց, որ մի շանս, այնուամենայնիվ, ջարդվեց մեր աչքի առաջ. ԲՀԿ-ն շանս ուներ լինելու սոցիալ-դեմոկրատական ուժ, որը կարող էր նպաստել Հայաստանի զարգացմանը:
Մանվել Սարգսյանի դիտարկմամբ՝ հասարակությունը մնաց մեն-մենակ գործող ռեժիմի դեմ, և սա կարող է նոր իրավիճակ ստեղծել: Խնդիրների խնդիրն է՝ հասարակությունը ինքը կհասկանա՞, որ ինքն իր ձեռքը պետք է վերցնի իրավիճակը: Նա նշեց, որ մենք ունենք բազմաթիվ երկրների փորձը, թե ինչպես են այս վիճակից դուրս գալիս, և այդ փորձը ցույց է տվել, որ երբ հասարակությունն ինքը դադարում է հույս կապել որևէ մեկի հետ, այդ դեպքում նման հասարակությունները հավաքվում և իրենց երկրներում արմատավորում են ազատ ընտրությունների մեխանիզմը՝ հեռացնելով գործող ռեժիմը: Սա փորձ է Հայաստանի համար, ի վերջո` քաղաքացիները կարող են ճանաչել այդ խնդիրը, ձևակերպել այն և հարցին լուծում տալ:
Լևոն Շիրինյանն էլ նշեց, որ աղքատ հասարակությունը արմատական ակտիվության գնալ չի կարող: Հասարակությունը, ըստ նրա, պետք է վերնախավից պահանջի փոփոխություններ:
