Ադրբեջանական Day.az կայքի փոխանցմամբ, ադրբեջանական քաղաքագետ, հակամարտությունների գծով փորձագետ Պարվին Դարաբադին անդրադարձ է կատարել ԵԱՀԿ առաքելության հաշվետվությանը.
«Այդ հաշվետվությունը վերջնականապես չբավարարեց կողմերից և ոչ մեկին: Այն հերթական անգամ ապացուցեց, որ գոյություն չունի 2 Հայաստան: Հայաստանը մեր կորուսյալ տարածքները վերաբնակեցնում է հայերով` դրանով իսկ փոխելով այդ տարածաշրջանի պատկերը:
Սակայն պետք է նշել, որ հակամարտության գոտում բնակեցվածները ոչինչ չեն շահում դրանից: Նրանց կենսապայմանները շարունակում են մնալ ծանր: Բացի այդ, Լեռնային Ղարաբաղին հարակից շրջանների վերաբնակեցման գործընթացը չի կրում զանգվածային բնույթ, ինչպես որ կցանկանար պաշտոնական Երևանը:
Համայն աշխարհի հայությունը չի շտապում ժամանել Ղարաբաղ, քանի որ գիտակցում է, որ վաղ թե ուշ այդ տարածքները «վերադարձվելու» են Ադրբեջանին` լինի դա ռազմական ճանապարհով, թե խաղաղ բանակցությունների միջոցով»:
Իր ամփոփիչ խոսքում ադրբեջանցի փորձագետը նշել է, որ դժբախտաբար, ԵԱՀԿ-ի հաշվետվությունը չունի պարտադրող ուժ, թեև Ադրբեջանի համար այն բացասական երանգներ չի պարունակում:
