Արիզոնա նահանգից ԱՄՆ նախկին կոնգրեսական Գաբրիել Գիֆորդսը, որին հաջողվել է ողջ մնալ 2011 թվականին գլխին հրազենային վնասվածք ստանալուց հետո, հայտարարել է բռնության մակարդակի նվազեցմանն ուղղված արշավի մեկնարկի մասին՝ կապված երկրում հրազենի կիրառման հետ: Այս մասին հայտնում է BBC-ն:
Նա և իր ամուսինը՝ նախկին տիեզերագնաց Մարկ Քելլին, մտադիր են պայքարել զենք արտադրողների և վաճառողների լոբբիի դեմ: Նրանք նաև կպրոպագանդեն զենքի նկատմամբ պատասխանատու վերաբերմունք:
Հունվարի 8-ին USA Today թերթում տպագրված հոդվածում ամուսինները հիշեցրել են Կոնեկտիկուտի դպրոցներից մեկում վերջերս տեղի ունեցած ողբերգության մասին, որին զոհ դարձավ 20 երեխա:
Համատեղ հոդվածում նրանք գրել են, որ ի պատասխան հրազենի կիրառմամբ սոսկալի դեպքերի շարքի՝ Կոնգրեսը ոչինչ չի ձեռնարկել:
