Հավաքարարների գործադուլի պատճառով, որը կազմակերպվել է աշխատավարձերի կրճատման և աշխատանքային վատ պայմանների դեմ, Իսպանիայի հարավային Գրանադա քաղաքի փողոցներում հավաքվել է ավելի քան 250 տոննա աղբ:
Ըստ արհմիությունների ներկայացուցիչների՝ բողոքի ակցիային մասնակցել են «Ինագրա» ընկերության աշխատակիցները, ովքեր ապահովում են քաղաքի մաքրությունը: Գործադուլի երկրորդ օրը հավաքարարները տրամադրում են միայն նվազագույն ծառայություններ և հիմնականում սպասարկում են բուժհաստատությունները, շուկաներն ու սպանդանոցները։
Աշխատակիցները վստահ են, որ ամանորյա և սուրբծննդյան տոներից վերադառնալուց հետո մարդիկ մեծ թվով աղբի կույտեր կնկատեն, և նրանց վրդովմունքը կստիպի ընկերության ղեկավարությանը փոխել ծախսերը 3,5 մլն եվրոյով կրճատելու իրենց որոշումը, որն առաջին հերթին կապված է լինելու աշխատավարձերի կրճատման հետ: Նրանք համարում են, որ ներկա դրությամբ նման միջոցառումները չեն կարող արդարացված լինել:
Դրանից բացի, ընկերության աշխատակիցները դժգոհ են, որ շաբաթական աշխատաժամերն ավելացել են՝ հասնելով 37,5 ժամի:
