Հայկական մամուլում տեղեկություններ են շրջանառվում այն մասին, որ «Բարգավաճ Հայաստանը», բաց թողնելով նախագահական ընտրությունները, պատրաստվում է մայիսին կայանալիք Երևանի քաղաքապետի ընտրություններին:
Այստեղ, անշուշտ, որևէ զարմանալի բան չկա: Զարմանալին կլիներ հակառակը՝ եթե քաղաքական կուսակցությունը, այն էլ խորհրդարանում իր մեծությամբ երկրորդը, չպատրաստվեր կարևոր ընտրական միջոցառումների: Եվ այս տեսանկյունից զարմանալին հենց այն էր, որ ԲՀԿ-ն բաց թողեց նախագահական ընտրությունները` այն դեպքում, երբ երկար ժամանակ սրում էր ինտրիգը այդ ընտրություններին իր մասնակցության շուրջ:
Սակայն հարց է առաջանում` արդյոք այս դեպքում է՞լ ԲՀԿ-ն ընդամենը չի սրում Երևանի քաղաքապետի ընտրություններում իր մասնակցության ինտրիգը, ինչպես նախագահականի դեպքում էր, իսկ վերջում, նույն նախագահականի օրինակով, չի դուրս գա խաղից միանգամից և առանց որևէ հոդաբաշխ բացատրության: Ավելին` հարցը նույնիսկ այն է, թե արդյոք այդ ինտրիգը «Բարգավաճ Հայաստա՞նն» է հյուսում, թե՞, ասենք, ՀՀԿ-ն, որին պետք է նույն կերպ ամայացնել դաշտը քաղաքապետի ընտրություններից առաջ, ինչպես որ արեցին նախագահական ընտրություններին ընդառաջ:
Նախագահական ընտրությունների ներկայիս ամայի գործընթացում էական, առանցքային դերակատարումը ԲՀԿ գործոնինն էր, որ օգտագործեց Հանրապետականը, մասնավորապես` Սերժ Սարգսյանը` ԲՀԿ-ի շուրջ կառուցելով ամբողջ խաղը կամ չխանգարելով, որ այն կառուցվի ԲՀԿ-ի շուրջ: Իսկ ամենավճռական պահին Սերժ Սարգսյանը կիրառեց պարզապես իր ազդեցությունը ԲՀԿ-ի վրա և հետ քաշելով կուսակցությունը` քանդեց ամբողջ խաղը:
Այնպես որ` ամենևին պետք չէ զարմանալ, եթե նույն մարտավարությունը կիրառվի նաև Երևանի քաղաքապետի ընտրությունների ժամանակ, առավել ևս, որ ՀՀԿ-ի հիմնական թեկնածու դիտվող Տարոն Մարգարյանը, մեղմ ասած, այնքան էլ չկարողացավ ծավալել այնպիսի գործունեություն և վարկ ձեռք բերել, որ հնարավոր լինել ակնկալել քաղաքացիների աջակցությունը: Տարոն Մարգարյանն ուղղակիորեն անիմաստ գումարներ էր մսխում Երևանում, այն դեպքում, երբ քաղաքն ուներ բազմաթիվ կարևոր ծախսերի կարիք:
Չի բացառվում նաև, որ քաղաքապետի պաշտոնի համար Տարոնի թեկնածության շուրջ տարակարծություններ և հակասություններ կան նաև ՀՀԿ-ի ներսում, և նորից խաղի մեջ գցելով ԲՀԿ-ին` Սերժ Սարգսյանը կփորձի նաև այդ միջոցով կառավարել այդ ներհանրապետական հակասությունները:
