Ֆրանսիական Air France ավիաընկերությունը իր շահութաբերության վերականգնման նպատակով մրցակցություն է սկսել փոքր բյուջեով ավիափոխադրողների հետ: Հունվարի 7-ից հնարավոր է Air France-ի չվերթների տոմսեր ձեռք բերել 49 եվրոյից սկսած: Այս մասին հայտնում է RFI-ը:
Էժան տոմսերը վաճառվում են երկուշաբթիից 58 ուղղություններով, որոնցով թռչում են Air France-ի օդանավերը Ֆրանսիայում, Եվրոպայում և միջերկրածովյան երկրներում: Խոսքն այն չվերթների մասին է, որոնք իրականացվում են Փարիզի Օռլի օդանավակայանից, ինչպես նաև Մարսելից, Տուլուզից և Նիցցայից:
Air France-ում նշում են, որ էժան տոմսերը մշտական կդառնան: Դրանք 20 եվրոյով էժան են ֆրանսիական ավիաընկերության չվերթների էկոնոմ դասի սովորական տոմսերից:
Գների իջեցման հաջողվել է հասնել ծառայությունների թվի կրճատման հաշվին: Այսպիսով՝ էժան տոմսերի դեպքում ուղեբեռը բացառվում է, թույլատրվում է միայն ձեռքի պայուսակ: Ուղևորներին չի տրվում օդանավում նստելու տեղը որոշելու հնարավորություն, ինչպես նաև մշտական հաճախորդները զրկվում են արտոնություններից:
Մեկ տարի առաջ ֆրանսիական ավիաընկերությունը հայտարարել է վերակազմավորման լայնածավալ ծրագրի մասին: Մինչ 2015 թվականը Air France-ը մտադիր է տնտեսել 2 միլիարդ եվրո՝ վերականգնելու իր շահութաբերությունն ու մրցունակությունը: Նոր ծրագիրը պատրաստվել է 4200 հաճախորդների շրջանում անցկացված հարցումերի հիման վրա: Նրաց 60 տոկոսի համար գինը եղել է ավիաընկերության ընտրության որոշիչ գործոն:
