Գերմանիայում սկանդալ է բռնկվել բավարական եկեղեցում տեղ գտած նկարի պատճառով, որում պատկերված մարդը, իբր, նման է նացիստների առաջնորդ Ադոլֆ Հիտլերին: Ենթադրյալ նմանության մասին հայտնի է դարձել վերջերս նկարը մաքրելուց հետո՝ հայտնում է The Daily Mail-ը:
Այդ նկարն առաջին անգամ ներկայացվել է 1939թ. Հոֆ քաղաքում Քրիստոսի եկեղեցու օծման ժամանակ՝ նշում է պարբերականը: Նկարում Հիսուսի կողքին կարելի է նկատել Հիտլերին բնորոշ բեղերով ու սանրվածքով մարդու՝ ասվում է հոդվածում:
Այդ տաճարում 8 տարի ծառայած քահանա Մարտին Գելկելը նմանությունը համարել է զուգադիպություն: Նրա խոսքով՝ նախկինում հավատացյալներից ոչ ոք չի բողոքել խորանի մոտի «Հիտլերին» պատկերող նկարից, սակայն այժմ որոշ հավատացյալներ կոչ են անում հեռացնել այդ նկարը:
