ԱՄՆ նախագահ Բարաք Օբաման առայժմ չի կողմնորոշվել երկրի ֆինանսների նախարարի պաշտոնի թեկնածուի հարցում, երկուշաբթի օրը մամլո ասուլիսի ժամանակ ասել է Սպիտակ տան պաշտոնական ներկայացուցիչ Ջեյ Քարնին:
Ավելի վաղ ֆինանսների ներկայիս նախարար Թիմոթի Գայթները հայտարարել էր, որ պատրաստվում է հունվարի 20-ին լքել պաշտոնը:
«Ես վստահ եմ, որ երբ նախագահը Թիմոթի Գայթների փոխարեն ֆինանսների նախարարի պաշտոնում թեկնածու առաջադրի, հույս կունենա, որ Սենատը նրան արագ կհաստատի: Բայց առայժմ ամսաթիվ չգիտեմ: Նախագահի համար էական է կարևոր պաշտոնների թեկնածուների մանրակրկիտ ընտրության ժամանակ ու հնարավորություն ունենալ, ուստի երբ նա պատրաստ լինի, կհայտարարի իր որոշման մասին»,- ասել է Քարնին:
Ներկայումս ակտիվորեն ձևավորվում է Օբամայի նախագահության երկրորդ ժամկետի վարչությունը,- փոխանցում է RIA Novosti-ն:
Ավելի վաղ Օբաման հայտնել էր պաշտպանության նախարարի և ԿՀՎ-ի ղեկավարի թեկնածուների անունները՝ Չակ Հեյգել և Ջոն Բրեննան: Վերջերս նախագահը ԱՄՆ պետքարտուղարի պաշտոնում առաջադրել է սենատոր Ջոն Քերիի թեկնածությունը:
