Հանրապետության նախագահի փետրվարի 18-ին կայանալիք ընտրություններում առաջադրված 15 թեկնածուներից միայն 6-ն են սահմանված ժամկետում` մինչև հունվարի 4-ը, ներկայացրել հինգ քառակուսի մետրը գերազանցող մակերեսով արտաքին գովազդային վահանակներում քարոզչական պաստառներ տեղադրելու հայտեր: Այս մասին «Pastinfo.am»-ին հայտնել է ԿԸՀ նախագահի մամուլի քարտուղար Հերմինե Հարությունյանը:
Հայտեր ներկայացրել են ՀՀ գործող Նախագահ, ՀՀԿ առաջնորդ Սերժ Սարգսյանը, «Ազատություն» կուսակցության նախագահ, ԱԺ պատգամավոր Հրանտ Բագրատյանը, «Ազգային ինքնորոշում միավորում» կուսակցության նախագահ Պարույր Հայրիկյանը, «Ազգային համաձայնություն» կուսակցության նախագահ Արամ Հարությունյանը, «Ժառանգություն» կուսակցության նախագահ Րաֆֆի Հովհաննիսյանը, «Ռադիո Հայ» ՍՊԸ ժողովի նախագահ Անդրիաս Ղուկասյանը:
Թեկնածուների ներկայացրած հայտերի հիման վրա արտաքին գովազդային վահանակներում քարոզչական պաստառներ փակցնելու իրավունքը թեկնածուների միջև կբաշխվի ԿԸՀ-ի որոշմամբ: Այն վահանակները և վահանակների կողմերը, որոնց վերաբերյալ ներկայացված է միայն մեկ հայտ, պաստառներ փակցնելու իրավունքը կվերապահվի միակ հայտը ներկայացրած թեկնածուին: Մնացած վահանակները, այդ թվում` վահանակի կողմերը, որոնց վերաբերյալ ներկայացվել են մեկից ավելի հայտեր, կառանձնացվեն որպես մրցակցային վահանակներ: ԿԸՀ-ն դրանք թեկնածուների միջև կբաշխի, ապահովելով հավասար բավարարման սկզբունքը: Յուրաքանչյուր թեկնածուին հասանելիք վահանակների կողմերի քանակի հաշվառմամբ կիրականացվի էլեկտրոնային վիճակահանություն: Միևնույն վահանակի երկու կողմերը բաժին կընկնեն տարբեր թեկնածուների:
Ընտրական օրենսգրքի համաձայն, ԿԸՀ-ի որոշման հիման վրա թեկնածուներն արտաքին գովազդային վահանակը տնօրինող կազմակերպության հետ կնքում են պայմանագիր` քարոզչական պաստառը փակցնելու համար: ԿԸՀ-ի որոշումն ուժի մեջ մտնելուց հետո` եռօրյա ժամկետում, թեկնածուի կողմից պայմանագիր չկնքվելու դեպքում գովազդային վահանակը տնօրինողն ազատ է կնքելու այլ պայմանագիր:
Այս դրույթները չեն վերաբերում ավտոմոբիլային ճանապարհների լայնությամբ փակցվող քարոզչական ձգապաստառներին: Այսպիսի պաստառներ փակցնելու թույլտվություն ստանալու մասին բոլոր դիմումները պետք է բավարարվեն դրանք փակցնելու թույլտվություն տվող պաշտոնատար անձանց կողմից: Ձգապաստառները փակցվում են թեկնածուի միջոցներով, դրանց տեղադրման համար գումար չի գանձվում:
Վահանակների քանակի, մակերեսների, դրանց գտնվելու վայրերի և վարձավճարների վերաբերյալ ԿԸՀ-ի պաշտոնական կայքէջում տեղադրված տեղեկատվության համաձայն, հանրապետության բնակավայրերում և մայրուղիներում քարոզչական պաստառներ տեղադրելու համար 22 տնտեսվարող սուբյեկտների կողմից 400-ից ավելի վահանակներ են առաջարկված:
Ըստ այդմ, մասնավորապես, Երևանում 1 քառակուսի մետրի ամսական վարձավճարը հիմնականում 6-8 հազար դրամ է: Սակայն, օրինակ, ընկերություններից մեկի կողմից մայրաքաղաքի կենտրոնում, 6 վայրերում, որոնց թվում են Աբովյան 34-ը («Փարիզյան սուրճ» սրճարանի դիմաց), Աբովյան հրապարակը, Պարոնյան-Մաշտոց խաչմերուկը, 11, 18 և 36 քառակուսի մետր մակերեսով վահանակների 1 ք.մ տրամադրման արժեքը մեկ ամսվա համար սահմանված է 11 հազար դրամ:
Մարզերի բնակավայրերում և միջպետական մայրուղիներում 1 ք.մ-ի գները տատանվում են 3,5-7 հազար դրամի սահմաններում:
