Ինչպես հաղորդում է Коммерсант օրաթերթը, Ռուսաստանի նախագահին կից մարդու իրավունքների հանձնաժողովի պատմական հիշողության աշխատանքային խումբը առաջարկել է նախագահ Մեդվեդևին պաշտոնանկ անել բոլոր այն պետական չինովնիկներին, որոնք հերքում են ԽՍՀՄ ամբողջատիրական ռեժիմի գործած հանցագործությունները:
Փաստաթղթի հեղինակնեը հայտարարել են, որ անհրաժեշտ է մշակել և Պետդումայի հաստատմանը ներկայացնել օրենք, որով կարգելվի հավերժացնել բոլոր նրանց հիշատակը, ովքեր պատասխանատվություն են կրում զանգվածային բռնությունների և այլ ծանր հանցագործությունների համար, որոնք ուղղված են մարդու իրավունքների և ազատությունների դեմ:
Հակաամբողջատիրականությունն առաջարկվում է դարձնել «Ռուսաստանի պաշտոնական քաղաքականության մի մասը», իսկ նախագահի ելույթը զանգվածային բռնությունների օրվա կապակցությամբ` ավանդական:
Խումբը նաև կոչ է արել իրականացնել Լենինի հուղարկավորությունը: Իսկ «Ժողովրդական համերաշխության» տարօրինակ անունով տոնը վերանվանել «Քաղաքական բռնադատվածների հիշատակի և ազգային համերաշխության օր»:
