Վրաստանի վարչապետ Իրակլի Ղարիբաշվիլին հինգշաբթի օրը կառավարության նիստի ժամանակ հայտարարել է, որ երկրում ճգնաժամի առաջացման ոչ մի վտանգ չկա: Այս մասին հայտնում է Ria Novosti-ն:
«Երկրում ճգնաժամի առաջացման ոչ մի վտանգ և սպառնալիք չկա: Մենք կայուն մեծամասնություն կկունենանք խորհրդարանում, իսկ կառավարությունը կշարունակի էլ ավելի արդյունավետ աշխատանքը»,- ասել է Ղարիբաշվիլին:
Նա նախարարների կաբինետի անդամներին կոչ է արել շարունակել նույն ոգով աշխատել, իսկ հանրությանը՝ հանգիստ մնալ և ցրել հնարավոր ներպետական հակամարտության վերաբերյալ կասկածները:
«Կառավարության ղեկավարը հույս ունի, որ ամեն ինչ ավելի լավ կշարունակվի, քան նախկինում էր»,- ասվում է նիստից հետո Ղարիբաշվիլիի մամլո ծառայության հրապարակած հայտարարության մեջ:
Վրաստանում քաղաքական իրավիճակի վերաբերյալ արդեն անհանգստություն են հայտնել ԱՄՆ Պետդեպը և Եվրոպական ժողովրդական կուսակցությունը:
Հիշեցնենք, որ Ղարիբաշվիլին պաշտոնից ազատել է երկրի պաշտպանության նախարար Իրակլի Ալասանիային: Ալասանիայից հետո իրենց պաշտոնները լքել են Վրաստանի ԱԳՆ ղեկավար Մայա Փանջիկիձեն ու եվրոպական և եվրոատլանտյան ինտեգրման հարցերով պետնախարար Ալեքսի Պետրիաշվիլին: «Ազատ դեմոկրատներ» կուսակցությունը, որի առաջնորդն է Իրակլի Ալասանիան, դուրս է եկել իշխող «Վրացական երազանք» կոալիցիայից:
