1000 սենյականոց նոր պալատը, որը կառուցվել է Թուրքիայի նախագահ Ռեջեփ Թայիփ Էրդողանի համար, բյուջեին կարժենա 615 մլն դոլար՝ կրկնակի թանկ, քան նախատեսվում էր ի սկզբանե: Նման հաշվարկներով հանդես են եկել թուրք պաշտոնյաները՝ փոխանցում է BBC-ն:
Ակ Սարայը կամ Սպիտակ պալատը, որը զբաղեցնում է ավելի քան 150 հազար քառակուսի մետր տարածք, կառուցվել է Անկարայի ծայրամասում՝ անտառապատ բլրի գագաթին:
Էրդողանը, ում «Արդարություն և զարգացում» կուսակցությունը գերիշխում է թուրքական քաղաքականության մեջ արդեն ավելի քան 10 տարի, պալատը բացել է օգոստոսի 30-ին, երբ նախագահ է դարձել: Հին նստավայրը փոխանցվել է վարչապետ Ահմեդ Դավութօղլուին:
Ակ Սարայը չափերով գերազանցում է Սպիտակ տանը, Կրեմլին և նույնիսկ Վերսալին: Պալատը զինված է ժամանակակից էլեկտրոնային համակարգերով, որոնք բացառում են գաղտնալսումը:
Ֆինանսների նախարար Մեհմեդ Շիմշեկի խոսքով՝ շինարարության գումարի մեծ մասը վճարվել է, իսկ մնացած մասը՝ 135 մլն դոարը, ներառվել է հաջորդ տարվա բյուջե: Շիմշեկը նշել է, որ ևս 185 մլն դոլար կծախսվի Airbus A330-200 նախագահական օդանավի վրա:
Նախագահի օգնականը հայտարարել է, որ հաջորդ տարի նախատեսված է նախագահի տրամադրության տակ գտնվող այլ օբյեկտների վերանորոգում:
