Լատվիայի Յուրմալա քաղաքի քաղաքապետ Գատիս Տրուկսնիսը հուսով է, որ երիտասարդ կատարողների «Նոր ալիք» մրցույթը չի լքի Լատվիան՝ կապված համահիմնադիր Ռայմոնդ Պաուլսի հեռանալու հետ:
Այն մասին, որ Պաուլսը հրաժարվել է ամենամյա մրցույթի կազմակերպման մասնակցությունից` հաղորդել է mixnews.lv ինտերնետ-պորտալը՝ հղում անելով հենց կոմպոզիտորին: Պորտալի հետ հարցազրույցում նա պատմել է, որ զանգահարել է իր գործընկերոջը՝ մրցույթի մյուս պրոդյուսեր, կոմպոզիտոր Իգոր Կռուտոյին, և հայտնել, որ «Նոր ալիքը» չի համապատասխանում իր երաժշտական ճաշակին, և որ ինքն այլևս չի ցանկանում մասնակցել դրա կազմակերպմանը:
«Յուրմալան շատ է հարստանում այդ մրցույթով: Մենք հետաքրքրված ենք նրանով, որ մեր քաղաքում նման միջոցառումներ շատ անցկացվեն, որոնք քաղաքը ժողովրդական կդարձնեն արտերկրում: Հիմք չունեմ մտածելու, որ այս տարի մրցույթը չի անցկացվի, չկա և ոչ մի վկայություն, որը կհաստատի իրադարձությունների նման զարգացումը: Քաղաքն իր կողմից անում է ամեն ինչ, որպեսզի մրցույթը տեղի ունենա, սակայն վերջին խոսքը կազմակերպիչներինն է»,- ասել է Տրուկսնիսը:
«Նոր ալիքը» սկսել է անցկացվել Յուրմալայում 2002 թվականին` Ռայմոնդ Պաուլսի և Իգոր Կռուտոյի նախաձեռնությամբ: Երաժշտական մրցույթի նպատակն է նոր աստղերի բացահայտումը:
