Թուրքիայի ԶՈւ գլխավոր շտաբի պաշտոնական կայքի «Հատվածներ պատմությունից» բաժնի «Հայերի գործողությունները 1914-1918 թթ. արխիվային փաստաթղթերով» ենթաբաժինը հանվել է: Այս մասի հայտնում է PanArmenian.Net-ը հղում անելով թուրքական Cumhuriyet լրատվական կայքին:
8 հատորանոց ժողովածուն, որն, ըստ կայքի, գլխավոր շտաբի Ռազմական պատմություն և ռազմավարական հետազոտություններ բաժնի կողմից պատրաստվել է որպես պատասխան հայկական «պնդումներին», թուրքերեն և անգլերեն լեզուներով, PDF ֆորմատով զետեղված էր ԳՇ-ի պաշտոնական կայքում:
Աշխատանքը պատրաստվել է 2006-2008 թվականների ընթացքում, որի համար իբրև թե օգտագործվել է օսմանյան և ռուսական 1047 արխիվային փաստաթուղթ: Աղբյուրը հաղորդում է, որ այժմ ժողովածուն հասանելի է միայն վերոնշյալ Ռազմական պատմություն և ռազմավարական հետազոտություններ բաժնի կայքում:
Cumhuriyet-ն անդրադարձել է նաև Հայաստանի և սփյուռքի կողմից Հայոց ցեղասպանության 100 ամյակին ընդառաջ իրականացվելիք լայնամասշտաբ միջոցառումներին՝ այդ համատեքստում տարօրինակ քայլ որակելով ԳՇ-ի կայքից հայկական թեմայով բաժնի անհետանալը:
