«Առաջին լրատվական»-ի Realpolitik հաղորդաշարի հյուրն է ՀՀԿ խմբակցության պատգամավոր Կարինե Աճեմյանը:
-Քաղաքական հիմնական օրակարգը շարունակում է զբաղված մնալ Եռյակի առաջադրած հիմնական պահանջով, այն է՝ 100% համամասնական ընտրակարգին նանցելու արագ և շուտափույթ գործողություններ, կամ էլ Եռյակի առաջնորդ Գագիկ Ծառուկյանը սպառնում է երկրում իշխանափոխության գործընթաց սկսել: Ինչպիսի՞ն են դրա վերաբերյալ ձեր գնահատականները, և արդյո՞ք իշխանությունը պատրաստվում է ձեռնամուխ լինել այդպիսի հնարավորության առնվազ քննարկմանը:
–Ես համաձայն չեմ, որ սպառնալիքներ հնչել են, իսկ համամասնական կարգին անցնելու առնչությամբ՝ իհարկե, մենք լսել ենք տարիներ շարունակ, որ որոշակի քաղաքական ուժեր ցանկանում են անցնել համամասնական ընտրակարգին: ՀՅԴ-ն էր, այս դեպքում ԲՀԿ-ն է, բայց մեր օրակարգում այդ խնդիրը դրված չէ: Ես պետք է ասեմ իմ անձնական տեսակետը՝ ես շատ պատգամավորների հետ թե եվրոպական, թե մերձբալթյան երկրներում հանդիպումներ եմ ունեցել, այդ թեմայով շատ զրուցել ենք, նույնիսկ Մերձբալթյան երկրները, օրինակ՝ Լիտվան, որ փոխել են իրենց ընտրակարգը և անցել համամասնականի հիմա շատ մեծ դժգոհություններ ունեն:
–Բայց Մերձբալթիակայում 100%-անոց համամասնական ընտարակարգի անցնելու տրամադրություններ կան:
–Լիտվան արդեն անցել է 100%-անոցի, իսկ հիմա հակառան է անում:Այսինքն՝ հասկացել են, որ ինչ-որ բան այնպես չէ: Ես ինքս համարում եմ, որ մեծամասնական ընտրակարգը շատ լավ ազդեցություն է ունենում: Եթե այդ համակարգը ճիշտ է գործում, պատգամավորները ակտիվ են գործում, դա շատ մեծ օգուտ է տալիս: ՀՀԿ-ի օրակարգում նման քննարկումներ չկան, մենք դրանց պատասխանը տվել ենք, ընտրական օրենսգրքում լուրջ փոփոխություններ իրականացնելու ժամանակ այդ մասին բարձրաձայնել ենք և նշել, որ դա հրատապ չենք համարում:
–Եռյակը չի բացառում իշխանության հետ երկխոսություն սկսելը՝ քննարկելու այս խնդիրները: Իշխանությունն էլ կարծես պատրաստակամ է: Հնարավո՞ր է՝ այդ հարցը հայտնվի ձեր օրակարգում:
–Այս պահին՝ ոչ, որովհետև մեր օրակարգում այլ հարցեր կան: Դա հայտնվում է այն ժամանակ, երբ Ընտրական օրենսգրքում փոփոխություններ են իրականացվում: Մենք Ընտրական օրենսգրքում փոփոխություններ արդեն իրականացրել ենք, և այս պահին այդպիսի խնդիր-պահանջ չկա: ՀՀԿ-ն քննարկումների համար միշտ շատ բաց է եղել:
–Չե՞ք վախենում իշխանափոխության սպառնալիքներից:
–Բոլորովին, որովհետև այդպիսի խնդիր հիմա դրված չէ: Իսկ ինչ վերաբերում է այն ուժերին, ովքեր իշխանափոխության խնդիր են դնում, ապա իրենք իրենց կարգավիճակը պետք է հստակեցնեն: Եթե դու արմատական ընդդիմադիր հայացքներով ես հանդես գալիս, որևէ առաջարկություն ես անում կամ հստակ դիրքորոշում ես ընդունում, ապա պետք է ասես, թե ով ես դու:
–Այդ դիրքորոշումը Դուք նշմարո՞ւմ եք ԲՀԿ-ի ելույթներում:
–Ոչ: Իսկ ինչ վերաբերում է հանրահավաքներին, որոնց մասին հիմա շատ են խոսում, եթե ԲՀԿ-ն ունի 37 պատգամավոր ԱԺ-ում, ունի 500 հազ. ընտրող: Նա կարող է իրեն թույլ տալ 15 հազ. հոգու հավաքել և հանրահավաքներ անցկացնել: Դրանք աշխարհում ընդունված են որոշակի հարցերի միջամտելու համար: Բայց ամենակարևոր համակարգային, ռազմավարական՝ եվրատնտեսական համագործակցության հարցում մենք բոլորս միակարծիք ենք:
–Գուցե այս հարցը ամենաֆունդամենտալն է: Որևէ տարբերություն չկա Ազտության հրապարակում կանգնող հիմնական ուժերի, բացառությամբ «Ժառանգության», և ՀՀԿ-ի տեսակետների միջև:
-«Ժառանգությունն» էլ է կարծես մեղմել իր մոտեցումը: Ինչքան էլ որ մենք ասենք, որ դա տնտեսական միավորում է՝ իրականում էլ դա տնտեսական միավորում է: 1000 էջանոց այդ պայմանագիրը շատ լուրջ մոտեցումներով հարուստ է, քննարկումները և այդ ուղղությամբ աշխատող պատասխանատուները շատ ակտիվ են, երկիրը դրանից պետք է շահի և քիչ կորուստներ ունենա:
–Ուստի եթե այդ հարցում կա համաձայնություն, ապա շատ դժվար չի լինի այլ հարցերում կայացնել համաձայնություն:
–Իհարկե, մանավանդ որ այն հարցերը, որ իրենք բարձրացնում են, մեզ էլ են անհանգստացնում, և մենք ինքներս պայքարում ենք, շատ մոտեցումներ փոխվում են:
–Այսինքն՝ Դուք ուզում եք ասել, որ կառավարությունը պայքարում է կոռուպցիայի դեմ, և մարդիկ իրենց մաշկի վրա կզգան:
–Հնարավոր է, որ ավելի ուշ զգան: Ես քանի որ վարչապետին ճանաչում եմ՝ որպես ԱԺ նախագահի, լավ գիտեմ, որ կարողանում է նաև ընդդիմության հետ աշխատել, որովհետև միշտ լսում է: Քննադատություններին մատերի արանքով չի նայում:
Ավելին՝ տեսանյութում:
