Ֆրանսիական մի շարք քաղաքներում անցկացվել են բողոքի ակցիաներ՝ ուղղված ոստիկանության դաժանության դեմ: Այս մասին հաղորդում է Agence France-Presse-ը:
Անկարգությունները տեղի են ունեցել ակտիվիստ բնապահպան 21-ամյա Ռեմի Ֆրեսի մահվան պատճառով: Վերջինս սպանվել է անցած կիրակի՝ անվտանգության ուժերի և Ֆրանսիայի հարավ-արևմուտքում ամբարտակի կառուցման դեմ հանդես եկող ցուցարարների բախումների ժամանակ: Նախնական տվյալներով՝ նրա մահվան պատճառը կարող է լինել ոստիկանների կողմից նետված էլեկտրաշոկային նռնակը:
Առավել խոշոր ցույցեր տեղի են ունեցել Նանտում և Թուլուզում, որտեղ ոստիկանները կիրառել են արցունքաբեր գազ: Նանտում տուժել են առնվազն հինգ ցուցարար և երեք ոստիկան, 21 մարդ ձերբակալվել է: Թուլուզում ձերբակալվել է 13 մարդ:
Բողոքի ակցիաներ են անցկացվել նաև Լիլլում, Բորդոյում և Ավինյոնում:
Ֆրանսիայի վարչապետ Մանուել Վալսը հայտարարել է, որ ցուցարարների գործողությունները պղծում են զոհված ակտիվիստի հիշատակը: Իր հերթին, Ֆրանսիայի ՆԳ նախարար Բեռնար Կազնևը նման ակցիաները համարել է «անընդունելի» և խոստացել մեղավորներին պատասխանատվության ենթարկել:
