«Այսօր մի ատյան չի մնացել, ուր Հայաստանի մասին, թեկուզ խորհրդատվական բնույթի, վատ զեկույցներ չլինեն: Այդ բոլորը եւ ԼՂ-ի շուրջ կուտակված բոլոր խնդիրները կուտակվելով ֆորսմաժորային իրավիճակ են ստեղծելու երկրում: ՀՀԿ-ն իր նախագահի հետ այնքան խոհեմ պիտի լինի, որ հրաժարական տա: Դրանից հետո նոր եկած ուժը կկարողանա ժամանակ շահել՝ ԼՂ խնդրի շուրջ որոշակի լուծումներ գտնելու համար»,- հայտարարեց Հանրապետություն կուսակցության անդամ, ՆԳ նախկին նախարար Սուրեն Աբրահամյանը` չբացառելով արտահերթ ընտրությունների հավանականությունը: «Այսինքն` դուք ձեր հույսը դրել եք նրա վրա, որ դրսի ճնշումների արդյունքում մենք կհրաժարվե՞նք մեր պաշտոններից»,- հարցրեց բանավեճի մասնակից ՀՀԿ-ական Արտակ Դավթյանը: Աբրահամյանը չբացառեց նաեւ այդ տարբերակը, ի պատասախան` Դավթյանը ասաց. «Դրսից եղած ճնշումների համար մենք այսօր «պարտական» ենք նաեւ ՀԱԿ-ին»: ՀՀԿ-ական պատգամավորը նաեւ համաձայնեց, որ իշխանությունը հավերժ չի կարող լինել իրենց կուսակցության մենաշնորհը: ՀԱԿ անդամ Սուրեն Աբրահամյանն էլ, պատասխանելով այն ակնարկներին, թե ժամանակին ինքը եւս եղել է Ռոբերտ Քոչարյանի թիմից, ասաց. «Ես միակ մարդն եմ, որ ինքնակամ հրաժարական եմ տվել: Եւ այսօր էլ պաշտոնապես հայտարարում եմ, որ երբ ընդդիմությունը գա իշխանության, իսկ դա մի օր հաստատ լինելու է, ես որեւէ պաշտոնի չեմ հավակնի»:
