ՀՀ նախագահի աշխատակազմին 2015թ. պետական բյուջեով կհատկացվի 4 միլիարդ 524 միլիոն դրամ, որը 341 միլիոն դրամով ավելի է, քան այս տարի: Այս մասին ԱԺ-ում 2015թ. պետական բյուջեի նախագծի նախնական քննարկման ընթացքում տեղեկացրեց ՀՀ նախագահի աշխատակազմի ղեկավարի առաջին տեղակալ Վարդան Արամյանը: Ըստ նրա՝ ավելացված գումարի 90 տոկոսը բաժին է ընկնում աշխատավարձի ավելացումներին:
Ամեն տարի նախագահի նստավայրը Հայաստանի երիտասարդական հիմնադրամի միջոցով 200 մլն դրամ գումար է հատկացնում ՀԿ-ներին՝ ծխելու դեմ պայքարի և այլ ծրագրերի համար: Վերջերս կայացած մրցույթի արդյունքներով՝ այս տարի 19 ՀԿ-ներ կպայքարեն վերարտադրողական առողջության, գյուղական համայնքների զարգացման, Հայոց ցեղասպանության 100-րդ տարելիցին ուղղված ծրագրերի, մերօրյա հերոսների փառաբանման և բնապահպանության համար։
Հիշեցնենք, որ անցյալ տարվա սկզբին «Ինֆորմացիայի ազատության կենտրոնը» պարզեց, որ ՀՀ նախագահի աշխատակազմը 2010-2013թթ. ընթացքում 31 ՀԿ-ների ֆինանսավորման համար պետական բյուջեից ստացել է շուրջ 500 մլն ՀՀ դրամ և ամենամեծ չափով գումար ստացած ՀԿ-ները նույն անուն-ազգանունով մարդիկ են ղեկավարում, ավելին` «Ազատություն» ռ/կ-ը բացահայտել էր, որ դրանք անգամ չեն էլ գործում իրենց գրանցած հասցեներում, պարզապես գոյություն չունեն:
Այս տարի նմանատիպ հետաքննություն էր կատարել «Սիվիլնեթը»` կրկին պարզելով, որ ծխելու դեմ պայքարի հարցում նախագահի գործընկեր, ՀՀԿ-ական պատգամավոր Կարեն Ավագյանի ղեկավարած Հայաստանի երիտասարդական հիմնադրամին տրամադրած 60 մլն դրամ գումարից 10 մլնը տրամադրվել է 4 ընկերությունների, որոնք, ինչպես պարզել էր «Սիվիլնեթը», որևէ միջոցառում չեն կազմակերպել և չեն պայքարել ծխելու դեմ: Բացի այդ, այս 4 կազմակերպությունների հիմնադիրները նույնպես նույն մարդիկ են՝ ՄԻԱԿ կուսակցության անդամներ:
Այսօր խորհրդարանում նախագահի աշխատակազմի ղեկավարի տեղակալ Վարդան Արամյանից «Առաջին լրատվական»-ը հետաքրքրվեց, թե քանի որ նախորդ տարիների փորձը ցույց է տվել, որ դրանք ոչ նպատակային են օգտագործվել, իրենք պարզե՞լ են արդյոք, այդ ՀԿ-ները իրոք գործո՞ւմ են, իրոք ծրագրեր իրականացնո՞ւմ են: «Իհարկե, իհարկե»,-ասաց Արամյանը՝ ապա հավելեց. «Մամուլում ի հայտ եկող լրատվությունը ես չեմ մեկնաբանում»: Երբ հետաքրքրվեցինք, թե ինչո՞ւ չի մեկնաբանում, ասաց. «Որովհետև ես քաղաքական պաշտոնում չեմ, ես հայեցողական պաշտոնում եմ և ներկայացնում եմ մասնագիտական մոտեցումներ: Մի տրամաբանական մոտեցում ձեզ ասեմ, եթե նախորդ տարիների նկատմամբ հասարակական կազմակերպությունների թվաքանակը էապես կտրուկ աճել է, իմ կարծիքով, դա արդեն խոսում է նրա մասին, որ գործընթացները լինում են բաց և թափանցիկ»: Մեր դիտարկմանը, որ այդ կազմակերպություններից մի քանիսը ոչինչ չէին արել, հակադարձեց. «Ես այդ մասին ոչինչ չեմ կարող ասել»:
Հայտնի է, որ ամեն տարի նախագահականը տարբեր ՀԿ-ների 60-100 մլն դրամ է տալիս՝ ծխելու դեմ պայքարի համար: Մեր հարցին, թե քանի ծխող է այդ քարոզչության արդյունքում դադարել ծխել, նախագահի աշխատակազմի ղեկավարի տեղակալը չպատասխանեց:
