Ռուսաստանցի քաղաքական վերլուծաբան Անդրանիկ Միհրանյանն այսօր լրագրողներին կոպտորեն հորդորեց «բազարի» չվերածել քննարկումը, այլապես կարող են ուղևորվել Ուկրաինա: Այսօր «Հայաստան. Աշխարհաքաղաքական հարաբերություններ» թեմայով կլոր սեղան անցկացվեց Հայ-ռուսական բարեկամական խորհրդարանական ակումբում Ժողովրդավարության և համագործակցության ինստիտուտի նյույորքյան ներկայացուցչության ղեկավար, ՄԳԻՄՕ-ի պրոֆեսոր Անդրանիկ Միհրանյանի մասնակցությամբ: Ինչպես «Առաջին լրատվական»-ն արդեն տեղեկացրել էր, Միհրանյանը նախաբանով հանդես գալու հնարավորություն ունեցավ, որից հետո պատասխանեց պատգամավորների և լրագրողների հարցերին: Լրագրողներից մեկի հարցին, թե ինչպե՞ս իր ազատություններով հետխորհրդային տարածքում առանձնացող Հայաստանը պետք է միանա եվրասիական ինտեգրացիոն պրոյեկտներին, որի անդամ հանդիսացող երկրներում չկան ազատություններ, Միհրանյանը զարմացավ և փորձեց ապացուցել, որ Ռուսաստանում գործում է աշխարհի ամենաազատ և լիբերալ մամուլը, որտեղ գործում է հակապետական, հակապուտինական, հակառեժիմական մամուլ: «Ես այդպիսի ազատ աղբյուր չգիտեմ ոչ մի երկրում»,- ասաց Միհրանյանը: Լրագրողներից մեկը փորձեց քննարկման էթիկան պահպանելով արձագանքել՝ ասելով. «Պուտինը չէ՞ր, որ միավորեց բոլոր գործակալությունները», Միհրանյանը բորբոքվեց և ներկաներին ցույց տվեց իրենց տեղը: Ավելին, նա ներկաներին բացատրեց, թե ինչպես պետք է մասնակցել քննարկմանը՝ սովորեցնելով քննարկման կանոնները:
«Մի րոպե՝ ես կվերջացնեմ, Դուք խնդրեք ձայն, Ձեզ ձայն կտան, կներկայանաք, ես Ձեզ կպատասխանեմ: Սա բազար չի, քննարկումը բազար չի, եթե Դուք չգիտեք, թե ինչպես է անցնում քննարկումը, սկզբից հարցրեք, ես Ձեզ կբացատրեմ՝ ինչպես է անցնում քննարկումը. ես վերջացնում-պատասխանում եմ, Դուք ձեռք եք բարձրացնում, ղեկավարը տալիս է ձայն, ներկայանում են և հարց են տալիս: Սա է օրենքը, եթե Դուք ուզում եք Եվրոպա և Միացյալ Նահանգներ լինել՝ այսպես, եթե ուզում եք լինեք բազար՝ ուկրաինական և չգիտեմ էլ ինչ, ապա welcome»,- կոպտորեն ասաց Անդրանիկ Միհրանյանը՝ շարունակելով պատասխանել հարցին և ապացուցելով, որ ռուսական բացառիկ ազատություններ չի տեսել ամբողջ աշխարհում:
