Մալաթիա-Սեբաստիա վարչական շրջանի ընդհանուր իրավասության դատարանում Ռոբերտ Պապոյանի նախագահությամբ ընթանում է Նվեր Ո.-ի գործի դատական քննությունը:
25-ամյա սևանցի Նվերը մեղադրվում է ՀՀ քրեական օրենսգրքի 139 հոդվածի 2-րդ մասի 3-րդ կետով այն բանի համար, որ 2014 թվականի ապրիլի 23-ին, ժամը 23-ն անց 30-ին Երևանի Օգանովի փողոցի շենքերից մեկի մոտ անչափահաս աղջկա նկատմամբ , նրա կամքին հակառակ, կատարել է սեքսուալ բնույթի գործողություններ:
Ըստ գործի նյութերի՝ 17-ամյա աղջիկն այդ օրը՝ ապրիլի 23-ին, մասնակցել է ջահերով երթին՝ դեպի Ծիծեռնակաբերդ: Եվ ուշ ժամին է բռնել տունդարձի ճամփան:
Աղջիկը, հասնելով իրենց թաղամաս, ցանկացել է զանգել մայրիկին, ասել, թե մոտենում է իրենց շենքին, թող մայրը չանհանգստանա:
Բայց աղջիկն իր հեռախոսով զանգել չի կարողացել՝ հեռախոսը լիցքաթափվել էր:
Նա շուրջն է նայել ու տեսել է բարձրահասակ մի երիտասարդի: Բացսրտորեն, քիչ առաջվա երթի միասնականության ոգով մոտեցել ու խնդրել է, որ երիտասարդը իր հեռախոսը մեկ րոպեով տրամադրի՝ մայրիկին զանգելու համար:
Երիտասարդը՝ Նվերը, տվել է հեռախոսը:
Աղջիկը զանգել է, մորն ասել, որ իրենց շենքին է մոտենում:
Հեռախոսը վերադարձրել է տղային, շնորհակալ է եղել ու քայլել է դեպի տուն:
Հանկարծ զգացել է, որ երիտասարդը գալիս է իր հետևից: Ճամփան անցնում էր ավտոտնակների արանքներով: Նվերը այդտեղ հասել է աղջկան ու տապալել է գետնին:
Այդ ընթացքում աղջկա մայրը դուրս է եկել բակ՝ դստերը դիմավորելու: Շուրջն է նայել, չի տեսել աղջկան, անհանգստացել է: Զանգել է այն համարով, որով աղջիկը մի քանի րոպե առաջ զանգել էր իրեն:
Այդ հեռախոսազանգին Նվերը չի պատասխանել: Նա աղջկան գցել է գետնին, պառկել նրա վրա, ձեռքերը գցել նրա կրծքին ու ոտքերին: Մի ձեռքով էլ ջանացել է փակել աղջկա բերանը, բայց աղջիկը հասցրել է աղմկել:
Մայրը լսել է աղջկա ձայնը, մոտ է վազել: Նվերը, նրան տեսնելով, փախել է՝ չմտածելով միգուցե, որ իր հեռախոսահամարը արդեն ամրագրված է տուժողի մոր հեռախոսում:
Այդպես՝ սևանցի երիտասարդը հայտնաբերվել է, կալանքի տակ է առնվել: Երևանում ամրակազմ երիտասարդը բեռնակրություն էր անում, ապրելու մշտական վայր էլ չուներ…
Նվերը հիվանդ մայր ու խճճված կյանքով երկու քույր ունի, փաստորեն՝ անբարենպաստ ընտանիքի զավակ է:
Որպես իր պաշտպանության տակտիկա՝ Նվերն ասել է, թե տուժողի նկատմամբ բռնի սեքսուալ գործողություններ կատարելու նպատակ չի ունեցել, ցանկացել է… ծանոթանալ նրա հետ: Իսկ բերանը բռնել է այն ժամանակ, երբ աղջիկը սկսել է գոռալ…
Ինքն էլ հասկանալով, թե ինչ անհամոզիչ է նման եղանակով անչափահաս աղջկա հետ գիշերային փողոցի թաքուն անկյունում «ծանոթանալը», Նվերն իրեն մեղավոր է ճանաչել ու զղջացել է կատարածի համար:
Դատարանում մեղադրողը հանդես է եկել մեղադրական ճառով: Նա հաստատված է գնահատել Նվերի մեղքը, միջնորդել է, որ դատարանը Նվեր Ո.-ին մեղավոր ճանաչի մեղսագրված հոդվածով ու դատապարտի 6 տարի ազատազրկման:
Ամբաստանյալի շահերի պաշտպանը ժամանակ է խնդրել պաշտպանական ճառին պատրաստվելու, ամբաստանյալի նկատմամբ հնարավորինս մեղմ պատիժ սահմանելու հիմնավորումները ձևակերպելու համար:
Պաշտպանական ճառը դատարանը կունկնդրի հաջորդ դատական նիստին:
