Մեծ Բրիտանիայի Համայնքների պալատի պատգամավոր Էրիկ Ջոյսը, ով հայտնի է իր պոռթկուն բնավորությամբ, ինչպես նաև ոգելից խմիչքների նկատմամբ ոչ անտարբերությամբ, վերջին երեք տարվա ընթացքում արդեն 4-րդ անգամ է ձերբակալվել: Այս մասին գրում է TASS-ը՝ վկայակոչելով Լոնդոնի ոստիկանությանը:
Իրավապահների խոսքերով՝ միջադեպը տեղի է ունեցել բարերով ու ռեստորաններով հարուստ լոնդոնյան Քեմդեն թաղամասում: Նշվում է, որ Ջոյսը ձերբակալվել է ծեծկռտուքի պատճառով, ընդ որում՝ նա կռվել է 15-ամյա դեռահասի հետ, ում անունը չի նշվում:
Ինչպես հայտարարում է քաղաքական գործիչը՝ այդ ամենը «հանգամանքների անհաջող զուգադիպություն է», որտեղ իր անձի նշանակությունը «շատ չափազանցված է»: 54-ամյա խորհրդարանականի խոսքերով՝ ինքը «ոչ մի դեպքում» իրեն մեղավոր չի համարում, այլ հակառակը՝ նույնիսկ հանդես է եկել «հասարակական բարոյականության» օգտին:
Ջոյսի խոսքերով՝ այդ երեկո ինքը մթերային խանութ է մտել և տեսել, որ մի երիտասարդ իրեն բարբարոսի նման է պահում: «Ես ոլորեցի նրա ձեռքերը և խանութի տիրոջը խնդրեցի ոստիկանություն կանչել… ընդամենն այսքանը»,- ասել է նա:
Այնուամենայնիվ, դեպքի վայր ժամանած ոստիկանները դեռահասի մարմնին ծեծի հետքեր են արձանագրել: Եվ չնայած դեռահասի մոտ գտել են թմրանյութեր, ձերբակալել են ոչ միայն նրան, այլև պատգամավորին:
