Գաղտնիք չէ, որ Մադոննան բարեգործությամբ է զբաղվում: Իսկ հիմա հայտնի է դարձել, որ այս լեգենդար փոփ-երգչուհու հաշվին 2012 թ. Մալավիայում 10 տարրական դպրոցներ են կառուցվել: Ինչպես հաղորդվում է News.com.au կայքում, ուրբաթ օրը 54-ամյա երգչուհին հայտարարել է, որ այդ նախագծի շնորհիվ 4870 երեխա կարող է կրթություն ստանալ:
Երգչուհու Raising Malawi բարեգորական հիմնադրամը և BuildOn ոչ կոմերցիոն կազմակերպությունը համատեղ ջանքերով ձեռնամուխ են եղել այս նախագծի իրականացմանը: Նրա բարեգործական կազմակերպության կայքում հաղորդագրություն է տարածվել Like A Virgin հիթի կատարողից, ով նշել է, որ ինքը լցված է էմոցիաներով, քանի որ բարեգործության ասպարեզում իրենց ջանքերը պսակվել են հաջողությամբ: Ըստ երգչուհու՝ հատկապես հաճելի է, որ այդ փոքրիկ երկրի աղջիկները կարող են կրթություն ստանալ: Մինչ այդ նրանք շատ հազվադեպ են դպրոց գնացել: Նա նաև ուրախությամբ հաղորդել է, որ դպրոցի կառուցումը կես տարով ավելի շուտ է ավարտվել, քան նախատեսվում էր: Raising Malawi ֆոնդի ներկայացուցիչները հայտարարել են, որ վեց դպրոցներ արդեն շահագործվում են, իսկ մյուս չորս դպրոցներում ուսումնական տարին կսկսվի 2013 թ. հունվարին:
Հիշեցնենք, որ երկու տարի առաջ Մադոննան նվիրաբերել է 15 մլն դոլար Մալավիայի մայրաքաղաքից ոչ շատ հեռու գտնվող՝ աղջիկների ակադեմիայի կառուցման համար: Սակայն երբ աղմուկ էր բարձրացել այդ շինության կառուցման ժամանակ տեղի ունեցած հանցագործությունների վերաբերյալ՝ շինարարությունը կասեցվել էր:
