2013 թ. ընդունված բյուջեի հետ կապված դրական ակնկալիքներ չեն կարող լինել, քանի որ բյուջեն տնտեսական ծրագիր է ենթադրում: Նման տեսակետ «Առաջին լրատվական»-ի հետ զրույցում հայտնեց ՀԱԿ անդամ, Երևանի նախկին քաղաքապետ Վահագն Խաչատրյանը: Ըստ նրա՝ փաստորեն նույն ամբողջ հարկային բեռի ավելացումն ավելի շատ մանիպուլյացիաների արդյունք է, քան հարկային եկամուտներ/ՀՆԱ ավելացման:
«Դա խաբկանք է, քանի որ համեմատելի չեն դարձնում ցուցանիշները: Եկող տարի կհամեմատեն, կասեն՝ ավելացել է, բայց այն դեպքում, երբ զինվորականների եկամուտներից սկսելու են եկամտահարկ գանձել, և միջին աշխատավարձի բարձրացումից եկամտային հարկի գանձումը կներկայացնեն հարկային մուտքերի ավելացում: Իրականում ոչինչ չի փոխվել, որովհետև ստվերը չի կրճատվում, որովհետև եթե ստվերի կրճատման հաշվին լինի ավելացում, ես կարող եմ նույնիսկ դրական գնահատական տալ 2013-ին: Բայց 2013-ին որևէ քայլ չի նախատեսված, որը ստվեր կկրճատի, որևէ քայլ չի նախատեսված, որը ՓՄՁ զարգացման կտանի, որևէ քայլ չի նախատեսված, որը կբերի աղքատության կրճատման»,- ասաց Վ. Խաչատրյանը՝ հավելելով, որ որպես տնտեսագետ՝ աղքատության կրճատման նպատակ դնելը ճիշտ չի համարում, և դրա փոխարեն պետք է տնտեսական ազատության նպատակ դնել:
Ըստ Վ. Խաչատրյանի՝ պետության դերի փոքրացում կա. «Սերժ Սարգսյանն ասում է ճգնաժամը 100 % հաղթահարել ենք, բայց սա էլ աբսուրդ է. աղքատությունը դարձնում են 35 %, պարտքը 1 մլրդից դարձնում 3 մլրդ, մինչև հիմա չեն կարողանում նախաճգնաժամային մակրոտնտեսական ցուցանիշներն ապահովել, բայց ասում են՝ հաջողությամբ են կատարել: Դա ի՞նչ է նշանակում: Այսինքն, պետք է ավելի վա՞տ լինեինք, կամ գոյությո՞ւն չունենայինք: Այս ամեն ինչից ելնելով՝ տնտեսության փոփոխություն 2013-ին ես չեմ տեսնում»:
