Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Արմեն Խաչատրյանի նախագահությամբ ավարտվեց անչափահաս Աշոտ Հ.-ի գործի դատական քննությունը:
1997 թվականի հոկտեմբերի 16-ին ծնված Աշոտը մեղավոր ճանաչվեց ՀՀ քրեական օրենսգրքի 112 հոդվածի 1-ին մասով այն բանի համար, որ 2014 թվականի մայիսի 21-ին, ժամը 17-ից մինչև 18-ը վիճաբանել է իր հորեղբորորդի, 1987 թվականին ծնված Ռուբենի հետ:
Վիճաբանության ընթացքում անչափահաս Աշոտը դանակով հարվածել է Ռուբենի կրծքավանդակի հետին մակերեսին՝ նրա առողջությանը դիտավորությամբ պատճառելով ծանր վնաս:
Աշոտը սովորել է դպրոցում մինչև 4-րդ դասարանը: Հոր հետ զբաղվել է առևտրով:
Հորեղբորորդու հետ վիճաբանությունը կենցաղային բնույթի է եղել: Անչափահասի հանցավոր արարքին նպաստել է նաև տուժողի հակաօրինական վարքագիծը:
Գործի մանրամասները դատարանում վեր չհանվեցին, որովհետև Աշոտն իրեն լիովին մեղավոր ճանաչեց ու միջնորդեց գործը քննել արագացված ընթացակարգով:
Մեղադրողը միջնորդել էր Աշոտին դատապարտել 4 տարի ազատազրկման, իսկ ամբաստանյալի շահերի պաշտպանը միջնորդել էր նրա նկատմամբ ազատազրկման հետ չկապված պատիժ սահմանել:
Ընդհանուր իրավասության դատարանը անչափահաս Աշոտ Հ.-ին մեղավոր ճանաչեց և դատապարտեց 3 տարի ազատազրկման:
