Ամերիկացի գրող և լրագրող Մառա Հվիսթենդալը գրել է այն մասին, թե ինչով է ավարտվել գերմանացի տեսաբան ֆիզիկոս Ուլֆ Լեոնհարդտի համար գրանտի ստացումը չինական «Հազարավոր տաղանդներ» ծրագրի շրջանակներում և հրավերը Հարավչինական մանկավարժական համալսարան։ Լրագրողուհու հոդվածը տպագրվել է Science ամսագրում։
«Հազարավոր տաղանդներ» ծրագիրը չինական կառավարությունը գործողության մեջ է դրել 2008 թվականին։ Ծրագրի նպատակն է երկարատև հիմունքներով արտասահմանյան գիտնականների ներգրավումը Չինաստան և նրանց հետազոտությունների հովանավորումը։ 2011թ. գերմանացի տեսաբան ֆիզիկոս Ուլֆ Լեոնհարդը եռամսյա համագործակցության առաջարկ է ստացել Հարավչինական մանկավարժական համալսարանից։ Համալսարանն առաջարկել է ամսական 133.333 յուան (21.800 դոլար) աշխատավարձ, ինչպես նաև Լեոնհարդտին ներկայացրել է գրանտների ստացման «Հազարավոր տաղանդներ» նախագծի և Գուանդուն նահանգի՝ գիտնականների ներգրավման ծրագրի շրջանակներում։
2012-ին նա և իր գործընկեր Յանա Զիլբերգը ստորագրել են պայմանագրեր, որոնց համաձայն՝ մեկանգամյա աշխատավարձ են ստացել՝ 500 հազար յուան (81.750 դոլար)՝ եռամյա համագործակցության համար։
Որոշ ժամանակ անց պրոֆեսորներ Լեոնհարդտն ու Զիլբերգը սկսել են կասկածել, որ իրենց հասանելիք միջոցները համալսարանը ծախսում է ոչ ճիշտ նշանակությամբ։ Իրավաբանները, որոնց դիմել են գիտնականները, պարզել են, որ պայմանագրերի չինական և անգլիական վարկածները տարաձայնություններ են պարունակում ինչպես գիտնականների հետ համագործակցության ժամկետների, այնպես էլ վճարման ենթակա գումարների մասով։ Նաև բացահայտվել է, որ համալսարանն արդեն 116.741 դոլար է (որը վերցվել է Լեոնհարդտին «Հազարավոր տաղանդներ» ծրագրով հասանելիք գումարից) ծախսել գծային շարժիչներ, մոնոխրոմատորներ, լազերներ և նոթբուքեր գնելու համար, որոնք պետք չեն եղել Լեոնհարդտի փորձերի համար, և գիտնականը չէր պատվիրել։
Ուլֆ Լեոնհարդտն ու Յանա Զիլբերգը միակը չեն, որ տուժել են չինական կողմի կամայականությունից։
