Ռումինիայի թագավոր Միխայ Առաջինի՝ արտաքսման մեջ գտնվող դուստրը՝ Իրինան, և նրա ամուսինը դատապարտվել են պայմանական ազատազրկման և խոշոր տուգանքի՝ ամերիկյան Օրեգոն նահանգում գտնվող իրենց ռանչոյում արգելված աքլորակռիվ կազմակերպելու համար: Այս մասին հայտնում է Reuters-ը:
Նահանգի իշխանությունները կնոջը ձերբակալել են անցած տարվա օգոստոսին: Հետաքննության տվյալներով՝ 61-ամյա Իրինա Ուոքերը և նրա ամուսինը՝ Ջոն Ուոքերը, վերջին կես տարում իրենց ռանչոյում կազմակերպել են առնվազն 10 աքլորակռիվ: Ամուսիններն արգելված շոուի յուրաքանչյուր հանդիսականից վերցրել են 10-ական դոլար, իսկ իրենց աքաղաղներին ցուցադրել ցանկացողներն ամուսիններին վճարել են մինչև 1000 դոլար:
Ամբաստանյալները գործարք են կնքել հետաքննության հետ, ինչի արդյունքում դատարանը նրանց դատապարտել է 3 տարվա պայմանական ազատազրկման և 200 հազար դոլար տուգանքի, որը վճարելու համար Ուոքերները համաձայնվել են վաճառել իրենց անշարժ գույքի մեծ մասը: