ՀՀ կառավարությունն այսօրվա նիստում որոշեց 1 մլրդ դրամ հատկացնել նախկին գլխավոր դատախազ Աղվան Հովսեփյանի ղեկավարած Քննչական կոմիտեին՝ այս տարվա պահպանման ծախսերի իրականցման համար:
Քանի որ տարվա ավարտին մնացել է ընդամենը մոտ 2 ամիս, կառավարության նիստից հետո լրագրողները Աղվան Հովսեփյանից հետաքրքվեցին, թե ինչու այդքան շատ գումար տրամադրվեց քննչական կոմիտեին:
«Առաջին լրատվական»-ի հարցին, թե ի՞նչ եք անելու այդ գումարը, Աղվան Հովսեփյանը պատասխանեց. «Աշխատավարձ ենք վճարելու քննիչներին»: Հստակեցմանը, թե այդքան շատ գումարը երկու ամսվա աշխատավարձի համա՞ր է, պատասխանեց. «Ձեզ շա՞տ ա թվում: Էդ այս տարվա համար քննչական կոմիտեի ամբողջ ծախսերն են»:
Աղվան Հովսեփյանն անպատասխան թողեց հարցը, թե չի՞ կարծում, որ բավական թանկարժեք կառույց է իր ղեկավարած ՔԿ-ն, և ավտոմեքենա նստելով՝ հեռացավ:
Նշենք, որ քննչական կոմիտեն սկսել է գործել սեպտեմբեր ամսից, այսինքն՝ այս տարի ընդամենը 4 ամիս է գործելու:
Ուշագրավ մի փաստ ևս. երկու ամիս առաջ կառավարության որոշում կայացվեց՝ կրկին 1 մլրդ դրամ գումար տրամադրել ՀՀ քննչական կոմիտեին: Կառավարության պահուստային ֆոնդից ՀՀ քննչական կոմիտեին հատկացվեց 1 մլրդ դրամ, որից 880 մլն դրամը՝ վարչական օբյեկտի հիմնանորոգման, իսկ 120 մլն դրամը՝ գրասենյակային գույքի ձեռքբերման համար:
Քննչական կոմիտեի համար Մամիկոնյանց 46/5 հասցեում հատկացված առանձին վարչական շենքի նորոգման համար կառավարությունն այս տարվա մայիսի 22-ի նիստում 2014 թվականի բյուջեի պահուստային ֆոնդից արդեն հատկացրել էր 27 միլիոն 500 հազար դրամ, այն էլ՝ հրատապ կարգով:
Մանրամասները դիտեք տեսանյութում: