Լիբիացի ապստամբները լքել են իրենց վերահսկողության տակ գտնվող Մարս Ալ-Բրեգա և Ռաս Լանուֆ քաղաքները և տեղափոխվում են Բենղազի: Այս մասին հաղորդում են արաբական լրատվամիջոցները: Նրանք նշում են, որ ապստամբներն այդ քայլին դիմել են այն բանից հետո, երբ սկսվել է Մուամար Քադաֆիին աջակցող ուժերի լայնածավալ հարձակումը:
Նշվում է, որ Քադաֆիի զորքերն օգտագործում են հրասայլեր և հրետանի, ինչը հանգեցրել է խուճապի: Աղբյուրները նշում են, որ հակահարձակմանը նպաստել է նաև այն, որ արևմտյան կոալիցիայի կողմից երեքշաբթի օրը չի իրականացվել ռմբակոծություն: Al-Arabia հեռուստաալիքը նշում է, որ ապստամբները լուրջ դժգոհություն են հայտնել կոալիցիայի գործողություններից, որոնք թույլ են տալիս Քադաֆիի առաջխաղացումը դեպի արևելք:
Մեծ Բրիտանիայի վարչապետ Դևիդ Քեմերոնը երեկ հայտարարել է, որ Քադաֆիի ուժերը շարունակում են գնդակահարել սեփական քաղաքացիներին` թողնելով նրանց արնաքամ լինել Լիբիայի քաղաքների փողոցներում.
«Նա անջատել է ջուրը, էլեկտրականությունը, արգելել է սննդի մատակարարումը, որպեսզի ստիպի հանձնվել:
Քադաֆին շարունակում է կոպտորեն խախտել ՄԱԿ-ի Անվտանգության խորհրդի բանաձևը»,- ասել է Քեմերոնը:
Սպասվում է, որ այսօր միջազգային կոալիցիան նորից կսկսի կառավարական զորամիավորումների ռմբակոծությունը` հաշվի առնելով ընդդիմության դեմ սկսված հակահարձակման նոր փուլը: