Միշտ կարելի է ավելին անել, սակայն նախանշված գերակայություններն իրականացվել են: Այս մասին Մամուլի ազգային ակումբի և ՀՀ-ում Ֆրանսիայի Հանրապետության դեսպանության նախաձեռնությամբ հրավիրված մամլո ասուլիսի ընթացքում ասաց ՀՀ-ում Ֆրանսիայի արտակարգ և լիազոր դեսպան Անրի Ռենոն՝ ամփոփելով Հայաստանում իր քառամյա դիվանագիտական առաքելությունը:
Նրա խոսքով՝ թեև չորս տարին երկար ժամանակ է առաքելությունն ավարտին հասցնելու համար, սակայն այն նաև կարճ է: Դեսպանն արձանագրում է, որ չորս տարիների ընթացքում հայ-ֆրանսիական երկխոսությունը խորացել է բոլոր ոլորտներում, բոլոր ոլորտներում առկա ներուժը փորձ է արվել օգտագործել:
Անրի Ռենոն հպարտությամբ ընդգծեց, որ իրեն բախտ է վիճակվել մասնակիցը լինել Ֆրանսիայի նախագահներ Նիկոլա Սարկոզիի և ֆրանսուա Օլանդի կատարած այցերին Հայաստանի Հանրապետություն:
«Ես ՀՀ-ից հեռանում եմ ոչ նպաստավոր փուլում՝ մի իրադարձության նախօրեին, որի նախապատրաստական աշխատանքներին ես ևս մասնակցել եմ. մոտ օրերս Ֆրանսիայում կկայանա Փարիզյան գագաթնաժողովը՝ երեք նախագահների մասնակցությամբ՝ Սարգսյան, Ալիև, Օլանդ»,- ասաց դեսպանը:
Անդրադառնալով տնտեսական ոլորտին՝ նա ասաց, որ հայ-ֆրանսիական հարաբերություններում առաջընթացներ գրանցվել են: Ըստ նրա՝ Հայաստանում հաստատվել և գործունեություն է ծավալում հիմնադրամների կառավարիչ ֆրանսիական ընկերությունը, սպասվում է նաև «Քարֆուր»-ի բացման արարողությունը. «Այդ ընկերության նորամուտը Հայաստան իր արգասաբեր ազդեցությունը կունենա արդյունաբերողների աշխատանքի վրա և օգտավետ, շահեկան կլինի սպառողների համար»:
Նա ընդգծեց նաև Հայաստանում Սարկոզիի այցի շեմին հայ-ֆրանսիական գործարար ակումբի հիմնադրման և Հայաստանի տնտեսական ոլորտի մասին թերթիկի պատրաստման կարևորության մասին: Խոսելով գիտական, բուհական, կրթական ոլորտների մասին՝ դեսպանը նշեց Ֆրանսիական համալսարանի, թիվ 119 ավագ դպրոցում ֆրանսերենի խորը ուսուցմամբ դասարանի բացման մասին:
«Ինչ չեմ հասցրել անել, անգամ չեմ մտածել այդ մասին: Իհարկե, կարելի է միշտ ավելին անել: Ի սկզբանե նախանշված էին գերակայություններ, ըստ իս՝ ինձ հաջողվել է իրականացնել նախանշված ծրագրերը, որոնք առանձնացվել էին: Բնականաբար, նախաձեռնված պրոյեկտները պետք է խորացվեն, որպեզի պտուղներն ավելի տեսանելի լինեն»,- ասաց իր առաքելությունը Հայաստանում ավարտող Անրի Ռենոն:
