Իրանական ILNA լրատվական գործակալության փոխանցմամբ՝ Իրանի ռեֆորմիստները նամակ են հղել երկրի հոգևոր առաջնորդ այաթոլլահ Ալի Խամենեիին՝ կապված առաջիկա նախագահական ընտրություններին Մոհամմադ Խաթամիի մասնակցության հետ: Այս մասին հայտարարել է Իրանի իսլամական կոալիցիոն կուսակցության ներկայացուցիչ Ասադոլլու Բադամչյանը:
Սեյեդ Մոհամմադ Խաթամին 1997 թվականի օգոստոսի 2-ից մինչև 2005 թվականի օգոստոսի 3-ը հանդիսացել է Իրանի նախագահը: 2009 թվականի նախագահական ընտրություններում Խաթամին աջակցել է Միր Հոսեին Մուսավիին: Նա քննադատել է Իրանի ներկայիս նախագահ Մահմուդ Ահմադինեժադի վարած տնտեսական, ներքին և արտաքին քաղաքականությունը:
Խաթամին բազմիցս հայտարարել է, որ երկրում ճգնաժամը սկսվել է 2009 թվականի ընտրություններից հետո, և այն շարունակվում է ցայժմ: Բադամչյանի խոսքերով՝ իրենց նամակում ռեֆորմիստները Խամենեիին խնդրում են թույլ տալ, որ Խաթամին մասնակցի առաջիկա ընտրություններին:
Իրանում նախագահական ընտրությունները տեղի են ունենալու 2013 թվականի հունիսի 14-ին:
