«Ես կոռեկտ չէի համարի մեկնաբանել Արմեն Գևորգյանի հրաժարականի դիմումը: Այդ հարցին լավագույնս կպատասխանի Արմեն Գևորգյանը»: Այս մասին այսօր լրագրողների հետ զրույցում ասաց Կառավարության աշխատակազմի ղեկավար-նախարար Դավիթ Հարությունյանը:
Թե ի՞նչ սեկտորում է նա աշխատելու, արտերկրո՞ւմ է աշխատելու, գնալու է Տիգրան Սարգսյանի մո՞տ՝ Դավիթ Հարությունյանը պատասխանեց. «Արմեն Գևորգյանի հետ կապված բոլոր հարցերը խնդրում եմ ուղղել իրեն: Ես կարող եմ խոսել իր արժանիքների մասին, երկար տարիներ միասին աշխատել ենք, բարձր եմ գնահատում իրեն թե՛ մասնագիտական, թե՛ մարդկային առումով»:
Հարցին՝ ամեն դեպքում Արմեն Գևորգյանին Քոչարյանի կադր համարո՞ւմ եք՝ Դավիթ Հարությունյանը ճշտեց՝ ի՞նչ է նշանակում Քոչարյանի կադր: Դիտարկմանը, որ Քոչարյանի քաղաքականությունը կրող՝ նա պատասխանեց. «Պարոն Քոչարյանն այս պահին քաղաքական դաշտում առկա չէ: Եվ ասել քաղաքականությունը կրող տերմինաբանությունը ուղղակի ճիշտ չէ: Այն, որ եւ Արմեն Գևորգյանը, և Հովիկ Աբրահամյանը, և ես աշխատել ենք, երբ նախագահ է եղել Ռոբերտ Քոչարյանը՝ իհարկե, մենք աշխատել ենք եւ աշխատել ենք մեկ թիմով»: