«Աղքատության վերացման համար պայքարը մեր ժամանակի բարոյական մարտահրավերներից մեկն է և չի կարող լինել առանձին անձանց նպատակը, այն պետք է լինի շատերի կոչումը: Այս՝ աղքատության վերացման համար պայքարի միջազգային օրը ես կոչ եմ անում բոլորին միանալ այդ պայքարին: Միասին մենք կարող ենք իսկական առաջընթացի հասնել աղքատության վերացման գործում»,- ասվել է 2006-ի հոկտեմբերի 17-ին ՄԱԿ-ի գլխավոր քարտուղարի ուղերձում՝ Աղքատության վերացման համար պայքարի միջազգային օրվա կապակացությամբ:
Օրվա պատմությունը սերտորեն կապված է 1987-ի հոկտեմբերի 17-ի հետ: Այդ օրն ավելի քան 100 հազար մարդ է հավաքվել Փարիզի Տրոկադերո հրապարակում, որտեղ 1948-ին ստորագրվել է մարդու իրավունքների համընդհանուր հռչակագիրը, որպեսզի օրը նվիրվի ծայրահեղ աղքատության, բռնության ու սովի զոհերի հիշատակին:
Իսկ 1992-ի դեկտեմբերի 22-ին ընդունած իր բանաձևով ՄԱԿ-ի Գլխավոր ասամբլեան հոկտեմբերի 17-ը հռչակեց Աղքատության վերացման համար պայքարի միջազգային օր:
