Հայաստանի ազգային օլիմպիական կոմիտեի նախագահ, ԲՀԿ առաջնորդ Գագիկ Ծառուկյանը մտադիր է դիմել Սերժ Սարգսյանին` մարտի 13-ից անազատության մեջ գտնվող հայտնի բռնցքամարտիկ Սամսոն Խաչատրյանի նկատմամբ մեղմ վերաբերմունք ցուցաբերելու խնդրանքով:
Գագիկ Ծառուկյանը օրերս պատասխանելով Սամսոն Խաչատրյանին վերաբերող հարցին` նշել էր. «Որպես Օլիմպիական կոմիտեի նախագահ` ես երկրի նախագահին դիմելու եմ, որ հնարավորության սահմաններում մեղմ մոտեցում լինի, որովհետև ամբողջ մարզաշխարհում նա սիրված, հարգված մարդ է»:
Նշելով, սակայն, որ Սամսոն Խաչատրյանը կարողացել է Հայաստանի հեղինակությունը ամբողջ աշխարհում բարձր պահել` Ծառուկյանը, միաժամանակ, ասել է, թե դա չի նշանակում, որ նման մեծ լումա, հեղինակություն ունեցող մարզիկները պետք է օրենքի խախտում թույլ տան:
Արդյո՞ք Ծառուկյանն իսկապես ուզում է օգնել Սամսոն Խաչատրյանին, թե՞ սա ընդամենը հայտարարություն է, որի նպատակը սեփական ազդեցությունը գովազդելն է` հարցրեցինք Սոցիալ-դեմոկրատ հնչակյան կուսակցության ատենապետ Լյուդմիլա Սարգսյանին:
«Ողջունում եմ Ծառուկյանի այդ հայտարարությունը, եթե դա իրոք նպաստելու է Սամսոնի ազատմանը: Ես վստահ եմ, եթե Ծառուկյանը իրոք զբաղվի այդ գործով և կոնկրետ պահանջներ դնի Սերժ Սարգսյանի առջև` այդ գործը նա կարող է հաջողացնել:
Նախևառաջ լինելով Հայաստանի ազգային օլիմպիական կոմիտեի նախագահ, կարծում եմ, նա լծակներ ունի Սամսոնին ազատ արձակելու: Եթե օգտագործի այդ լծակները, և Սամսոնը ազատության մեջ հայտնվի, ուրեմն նպատակը իրոք ազնիվ է եղել: Իսկ եթե կմնա հայտարարության տեսքով, ուրեմն դա ընդամենը սեփական անձի PR կլինի:
Մտահոգ մարդիկ շատ-շատ կան, մենք դա տեսնում ենք հացադուլի տեսքով, բայց դա դեռ չի նշանակում, որ այդ մարդիկ մտահոգությունից բացի, որևէ գործնական քայլ են անում` ինչ-որ բան այս երկրում փոխելու համար: Հետևաբար` մտահոգությունը շատ քիչ է, պետք են կոնկրետ քայլեր, կոնկրետ գործողություններ և կոնկրետ օգնություն Սամսոն Խաչատրյանին:
Ուրախ կլինեմ, եթե խոսքից գործի վերածվի Ծառուկյանի նախաձեռնությունը: Իսկ եթե ոչ, ուրեմն դա հերթական մտադրություն է, ինչպես տարբեր հարցերի շուրջ արտահայտվում է շատ-շատերի մոտ»,- մեզ հետ զրույցում ասաց Լյուդմիլա Սարգսյանը: