ԱՄՆ նախկին նախագահ Ջորջ Բուշ-ավագի առողջական վիճակը կտրուկ վատացել է: Նա արդեն մեկ ամսից ավելի ամերիկյան Տեխաս նահանգին Հյուսթոն քաղաքի հիվանդանոցում է: Բուշ-ավագը տեղափոխվել է վերակենդանացման բաժանմունք,- դեկտեմբերի 26-ին հայտնել է նրա ներկայացուցիչներից մեկը՝ Ջիմ Մաքգրան:
Նա պատմել է, որ Բուշ-ավագը գիտակից է, շփվում է բուժանձնակազմի և իր ընտանիքի անդամների հետ: «Մի շարք բարդություններից հետո, ներառյալ՝ չիջնող ջերմությունը, Բուշին տեղափոխել են վերակենդանացման բաժանմունք: Նրա վիճակը հսկողության տակ է»,- ավելացրել է Մաքգրան: Բժիշկները լավատեսորեն են վերաբերվում բուժման ընտրված կուրսին, գրում է ITAR-TASS-ը:
Ավելի վաղ հայտնում էին, որ 88-ամյա նախկին նախագահն արդեն մի քանի օր բարձր ջերմություն ունի: Բժիշկներն առայժմ դժվարանում են ասել պատճառը: Բուշ-ավագը հիվանդանոց է տեղափոխվել նոյեմբերի 23-ին բրոնխիտից բուժվելու համար: Սուրբ Ծնունդին նրան այցելել են կինը՝ Բարբարան, որդին՝ Նիլն ու նրա կինը, թոռներից մեկը:
Ջորջ Բուշ-ավագն ԱՄՆ 41-րդ նախագահն է եղել, երկիրը ղեկավարել է 1989-1993 թվականներին: